Thuajse të gjitha reagimet kundër bojkotit të PD-së nga zgjedhjet e 18 qershorit, konvergojnë përgjithësisht tek e njëjta pikë: që Lulzim Basha ka anashkaluar forumet e forcës politike që drejton dhe nuk ka mandat përfaqësues për këtë vendim politik.
Realisht vendimi është i natyrës thelbësore për një forcë politike dhe përbën një detyrim të paevitueshëm që një i tillë i kësaj peshe të kërkojë sa më shumë njerëz për vendimarrjen. Këtë e kërkon dhe vetë sistemi me pluralitetin si frymë. Ndërkaq, ka plot edhe precedentë në historinë e afërt dhe të largët të demokracisë, por edhe të viteve të komunizmit, kur vendimmarrjet e tilla kanë kaluar sitën e forumeve, madje dhe për çështje pak më të lehta.
Nuk është e tepruar të thuhet se dhe kur Enver Hoxha donte të merrte ndonjë vendim për t’i ndërsyrë Amerikës apo “socialimperializmit”, gjithsesi i mblidhte Pleniumet, që ishin pak a shumë si Asambletë Kombëtare apo Komitetet Drejtuese të sotmet.
Vërtetë që anëtarët e pleniumeve vetëm thërrisnin “Rroftë Enveri”, po në 25 vjet demokraci a nuk ndodh e njëjta gjë në partitë tona?
Dhe le të vijmë më afër, në demokraci.
PD-ja e Sali Berishës-kryetar ka marrë disa vendime të rëndësishme dhe me shumë me peshë politike përgjatë dy dekadave.
Le të marrim të parin: largimin nga Qeveria e Stabilitetit, ku formalisht është vendosur nga mbledhja e Këshillit Kombëtar që të ndërrmeret ky hap.
Më pas vjen bojkoti i parlamentit të vitit 1997. U propozua nga Berisha por vendimi final u morr nga Këshilli Kombëtar.
Precedenti tjetër është ai Edi Ramës në opozitën e pas zgjedhjeve të vitit 2009, që gjithashtu u shoqërua me bojkot dhe një çadër me grevë urie nën të.
Aksioni i fundit me çadër i Bashës, i cili në frymë dhe në disa detaje mëton t’i përngjajë dhe atij të Ramës së para 8 viteve, bën diferencën pikërisht tek respektimi i forumeve, mosllogaritja e tyre se janë gjallë.
Ja ç’ndodhi: zgjedhjet e 2009-ës. Berisha dhe aleatët 70 mandate, Edi Rama dhe Ilir Meta, 70 mandate. Barazim!
LSI vendos të qeverisë me Sali Berishën.
Ben Blushi, së bashku me LMN-në kërkon largimin e Edi Ramës publikisht.
Thirret Asambleja e PS-së që vendos të mblidhet Kongresi i Jashtëzaonshëm i PS-së.
Rama shtron idenë se zgjedhjet janë vjedhur dhe se duhet një aksion radikal i opozitës për të rezistuar.
Kongresi vendos pas një debati që u zhvillua me dyer të mbyllura për të vazhduar aksionin opozitar duke kërkuar hetim në disa zona të vendit.
Kurse në rastin e çadrës së PD-së, vendimet për negociatat mbi zgjedhjet apo edhe qëndrimin për 18 qershorin, që më 18 shkurt janë marrë diku në mister dhe të anonçuara nga Lulzim Basha në momentin e fundit pa u kaluar në sitën e forumeve. /tesheshi.com/
