Për Gjergj Bojaxhiun, themelues i “Sfida për Shqipërinë“, modeli aktual politik është klientelist dhe i paligjshëm dhe për aq kohë sa nuk ka ndryshuar raporti mes qytetarëve dhe politikës çdo reformë është e destinuar të dështojë.
Ai dhe qytetarët që i janë bashkuar “Sfidës” besojnë se do të krijojnë një “kult” të ri politik për shtresën e shqiptarëve të pakënaqur me këtë model. “Për mua është pak e çuditshme të quhem populist, sepse e kam menduar veten si jashtë të qenurit populist dhe e kam shumë të vështirë si tipologji të bëj populistin. Ne si grupim mendojme se në Shqipëri ka dështuar demokracia, kemi një shoqëri që tashmë po kthehet qartazi në një partikokraci, po vetem se nuk është më një siç ka qenë dikur, por janë bërë disa. Ka dështuar raporti midis sovranit dhe shërbyesit politikanit, ata janë bërë pothuajse pronarë dhe shumica e qytetarëve janë kthyer në lypsarë. Unë populist do të quaj një përqasje kur del, flet dhe bën premtime për gjëra që kanë bëjnë me përdorimin e taksave, etj..” – u shpreh Bojaxhiu gjatë diskutimit me pedagogë dhe studentë të UET.
Duke sqaruar pozicionin e tij si përfaqësuesi kryesor politik i kësaj lëvizje Bojaxhiu theksoi se qëndrimi bazë ka të bëjë me ndryshimin e raportit mes qytetarit dhe politikës. Në këtë kontekst ai beson se edhe reformat që ndërmerren do të dështojnë. “Nëse ne nuk ndryshojmë nga ana strukturore raportin që ka sot midis qytetarëve dhe politikës, çdo lloj reforme që ne po propozojmë apo mund të propozohet nga grupe të ndryshme do ngelet dështim. Ne si lëvizje, si sfidë nuk kemi shkuar drejt populizmit, ne kemi shkuar drejt ndryshimit të raportit midis qytetarit dhe politikanit. Ato që ne kemi propozuar kanë të bëjnë drejtpërdrejt me këtë raport. Ne mbështesim reformën në drejtësi dhe mendojmë se vettingu duhet të bëhet dhe në klasën politike. Korrupsioni buron nga politika dhe jo nga administrata. Në administratë reflektohet”- theksoi Bojaxhiu. /tesheshi.com/
