Ish-kryeministri Sali Berisha ka reaguar sot përmes një komenti në rrjetet sociale për ikjen e infermierëve nga Shqipëria.
Berisha thotë se premtimi i kryeministrit Edi Rama në vitin 2013 se 40 mjekë do të vijnë për të punuar në Shqipëri, ishte një mashtrim.
“Pas njoftimit të urdhërit të mjekëve se gjatë viteve 2016-2017 janë larguar nga Shqipëria 275 mjekë dhe disa burime njoftojnë se kanë bërë kërkesë edhe 140 të tjerë, urdhëri i farmacistëve informon se numri i farmacistëve, që ka aplikuar për largim gjatë këtyre muajve të vitit 2017 është më i madh se sa i viteve 2015-2016 të marra së bashku.
Kështu vazhdon braktisja e madhe e dheut të Noriegës. Atyre që kanë memorie ju kujtohet vjeshta e vitit 2013 kur Edi Rama ftoi në kryeministri nga anekënd botës 40 mjekë dhe mashtroi shqiptarët se ata kishin vendosur të lënë klinikat në vendet ku punonin dhe të ktheheshin për të rilindur Shqipërinë.
E vërteta është se asnjë prej tyre nuk u kthye në Shqipëri. E kundërta ndodhi, 275 mjekë janë larguar nga Shqipëria dy vitet e fundit për shkak të rrogave të ulta, pasigurisë së madhe, korrupsionit qeveritar.
Po duhet të jemi korrekt, se jo për të gjithë rilindja e Ramës është provuar rivdekje, jo dhe jo! Në atdheun e dashur shumë, erdhi turravrap vëllaçko Olsi së bashku me bandën e tij të kokainës. Kështu që shqiptarët duhet të falenderojnë Ramën se me ardhjen në atdhe të vëllaçko Olsit, Shqipëria u ngjit në çatinë e botës për përdorimin dhe trafikimin e kokainës. Bravo bravo!!”, shkruan Berisha. /tesheshi.com/
