Ditën që Greqia dërgon ushtrinë në kufi me Shqipërinë, ish-kryeministri Sali Berisha dhe deputeti Ben Blushi kanë sulmuar Edi Ramën për aleancën e tij me Turqinë.
Berisha ka përdorur një gjuhë të ndërlikuar duke thënë ambasadori turk në Tiranë në vitin 2013 deklaronte se në Shqipëri do të fitonte Partia Socialiste, duke nënkuptuar lidhjen e hershme të marrëdhënieve të Ramës me presidentin aktual të Turqisë, Erdogan. Ndërkaq, Berisha sërish ka përmendur palën e tretë në lidhje me Paktin Detar, të cilin dhe vetë Athina e ka përmendur.
Ndërkohë, ministri i jashtëm Ditmir Bushati, deklaroi se ish-kryeministri është kthyer në superstar të mediave të vendit fqinj.
Kurse Ben Blushi, ka kaluar në islamofobi, duke i thënë Ramës se pse i mbron muslimanët, a je një imam xhamie.
Një deklarim pa lidhje po të mos vazhdonte me akuzën se Rama ka sulmuar Trump i sponsorizuar, duke e drejtuar gishtin tek shteti turk.
Natyrisht të gjitha këto kanë rastisur në një ditë kur Greqia provokoi Shqipërinë.
Për herë të parë që nga gushti i vitit 1949, qeveria e Athinës dërgon tanket dhe mjetet e rënda luftarake në kufi me Shqipërinë, duke përdorcuar një qëndrim të Ministrit të Jashtëm Kotzias se Greqia ka forcë më të madhe se Shqipëria.
Duhet thënë se të dy vendet janë anëtarë të NATO-s. Stërvitja greke nuk ka të bëjë fare me Aleancën Veriatlantike, por është më shumë një manovër politike.
Prej datës 7 nëntor, Greqia ka dislokuar në kufirin me Shqipërinë tanket dhe mjetet e saj të rënda më moderne luftarake në kuadrin e një stërvitjeje të koduar “Mburojë çeliku”. Mësohet se bëhet fjalë pikërisht për stërvitjen e Brigadës së 8-të sulmuese të ushtrisë greke, në përbërje të së cilës janë efektivët më elitarë të këmbësorisë. Për këtë stërvitje ushtarake bie në sy fakti se pothuajse në të gjitha mediat greke, është publikuar pothuajse i njëjti tekst njoftimi, që ndonëse nuk përmend në asnjë rresht Shqipërinë, nënkupton qartë një paralajmërim serioz që Athina zyrtare ka vendosur t’i bëjë Tiranës.
“Video na kujton se në çdo drejtim ushtria jonë është e pranishme në të gjithë territorin e Greqisë. Edhe aty ku nuk ka asnjë problem të madh ushtarak, sepse nuk ka asnjë armik, por ka shumë udhëheqës sfiduese dhe miqtë të afërt me Ankaranë. Greqia nuk ka nevojë për të bërë një përballje ushtarake me asnjë. Por ata që e interpretojnë durimin e Greqisë si një dobësi, është e këshillueshme që të ‘pushojnë’ retorikën e tyre kundër Greqisë”, citohet nga mediat greke.
Rreth një muaj më parë ishte kreu i diplomacisë greke, Niko Kotzias, ai që paralajmëroi Shqipërinë të tregojë kujdes me çështjen çame, duke i kujtuar asaj se nuk mund ta nënvlerësojë Greqinë, për shkak të krizës që ajo po kalon. Deklaratat e drejtpërdrejta të ministrit të Jashtëm të Greqisë u bënë në një intervistë në median greke, ku ndër të tjera Kotzias nuk harroi të përmendë edhe epërsinë ushtarake të Greqisë, ndonëse me Shqipërinë është aleate në NATO.
“Greqia ia kalon në të gjitha drejtimet. Ka dhjetëfishin e GDP-së, sisteme të shumëfishta mbrojtjeje dhe sigurie, shumëfish forcë ekonomike. Ata janë të varur sa i përket ekonomisë, remitancave të emigrantëve, investimeve, tregtisë. Kemi edhe përfaqësim asimetrik në arenën ndërkombëtare. Ndaj është mirë që të bashkëpunojnë, të bëhen realistë dhe të ndihmojnë në krijimin e marrëdhënieve të përfitimit të përbashkët. Të zgjidhim çështjet e hapura bazuar në të drejtën ndërkombëtare dhe traditën europiane”, paralajmëroi Koztias.
Pikërisht këto deklarata i paraprinë edhe stërvitjes së Brigadës së 8-të të këmbësorisë që Greqia sapo ka nisur në kufirin me Shqipërinë, duke i dëshmuar edhe nga afër epërsinë ushtarake. /tesheshi.com/
