Bashkimi Europian u ka kërkuar dje vendeve anëtare të pranojnë në dy vitet e ardhshme 40.000 azilkërkues nga Siria dhe Eritreja, të zbritur tashmë në Itali dhe Greqi.
Në një konferencë shtypi, komisionieri europian për emigracionin, Dimitris Avramopulos, përsëriti gjithashtu një propozim të mëhershëm, duke u kërkuar shteteve anëtare të pranojnë 20.000 njerëz nga vende të treta që kanë “një nevojë të qartë për mbrojtje ndërkombëtare.”
Avramopulos i mëshoi faktit se Komisioni Europian nuk po propozonte një sistem kuotash për shpërndarjen e njerëzve. “I takon çdo anëtari të vendosë se sa refugjatëve do t’u japë statusin e refugjatit,” bëri të ditur ai.
Italia dhe Greqia, dy vende që po përballen me valën e emigrantëve nga ana tjetër e Mesdheut, u bënë thirrje 26 vendeve të tjera të BE-së ta ndajnë me to barrën.
Por shumë shtete anëtare, të gjendura nën presion nga partitë kundër emigrantëve, i kanë kundërshtuar fort kuotat.
Propozimi i mësipërm sugjeron që emigrantët të shpërndahen sipas katër kritereve: prodhimit të përgjithshëm bruto, popullsisë, papunësisë, dhe numrit të kërkesave për azil që janë regjistruar tashmë.
Komisionieri europian për emigracionin foli për një “mekanizëm emergjence”, pasi në Bruksel është e pranishme frika për një valë të re emigrantësh dhe azilkërkuesish gjatë verës në Itali, Greqi dhe Maltë.
Qeveria e re britanike, e cila kërkon ta reduktojë emigracionin, u shpreh se nuk do të merrte pjesë në asnjërën skemë. Britania, me të drejtat e veçanta që gëzon, mund të zgjedhë të bëhet pjesë apo jo e propozimeve të BE-së për emigracionin.
Kundërshti ndaj planit ka patur dhe në vendet e Europës qendrore dhe lindore.
Italia dhe Greqia janë portat kryesore në Europë për emigrantët nga Afrika e Veriut, Azia dhe Lindja e Mesme, më shumë se 600.000 e të cilëve kërkuan strehim në BE vitin e shkuar. /tesheshi.com/
