Numri i të uriturve në botë ka rënë nën 800 milionë për herë të parë që prej një çerek shekulli, nga një miliard që ishte asokohe.
Një raport vjetor i Organizatës së Bujqësisë dhe Ushqimit të OKB-së (FAO) tregoi se në botë ka 795 milionë njerëz që vuajnë nga uria, diku te 216 milionë më pak se në vitet 1990-1992, e kjo pavarësisht katastrofave natyrore, konflikteve dhe varfërisë.
Mbizotërimi i ushqimit të pamjaftueshëm ka rënë në 12.9 për qind të popullatës në botën në zhvillim, nga 23.3 për qind rreth 25 vite të shkuara, gjithnjë sipas raportit.
Më shumë përparim në reduktimin e urisë treguan vendet e Azisë Lindore, të Amerikës Latine, e të Karaibeve, falë rritjes ekonomike që nuk la pas dore të varfërit, investimeve në bujqësi dhe qëndrueshmërisë politike.
Një total prej 72 vendesh, nga 129 të mbikëqyrura nga FAO-ja, i kanë përmbushur Objektivat e Zhvillimit të Mijëvjeçarit për ta përgjysmuar këtë vit përqindjen e ushqimit të pamjaftueshëm.
Me gjithë suksesin, përparimi është penguar në vitet e fundit nga ato çka FAO-ja i quajti “hije të zeza”: katastrofat natyrore, ngjarjet e motit ekstrem, paqëndrueshmëria politike dhe konfliktet civile.
Afrika nënsahariane është rajoni më i preku nga uria, me një në katër persona që vuan nga ushqimi i pamjaftueshëm.
Vendet afrikane që kanë arritur objektivat e ushqimit të OKB-së e kanë bërë këtë duke nxitur prodhimtarinë e fermerëve të tyre.
Agjencia e OKB-së vuri në dukje tre faktorë në luftimin e mungesës së ushqimit: përmirësimi i prodhimit bujqësor, nxitja e rritjes përfshirëse, dhe zgjerimi i mbrojtjes shoqërore.
OKB-ja paralajmëron se ka ende shumë sfida që duhen kapërcyer nëse nga viti 2030 kërkohet t’i jepet fund urisë në botë. /tesheshi.com/
