Bashkimi Evropian mund të dështojë në planet që duhet t’i sigurojnë atij një vend të spikatur në prodhimin global të baterive, ka paralajmëruar Gjykata Evropiane e Auditorëve (ECA).
Plani është skicuar nga Komisioni Evropian dhe ai mund të pengohet nga aksesi i kufizuar në lëndët e para, rritja e kostove dhe konkurrenca e fortë, përfunduan audituesit.
Kushtet e favorshme të prodhimit mund t’i detyrojnë prodhuesit të zhvendosin operacionet në vende të tjera, përfshirë SHBA-në, e cila ofron “stimuj të mëdhenj” për prodhimin e mineraleve dhe baterive, vunë në dukje auditorët.
BE-ja është shumë e varur nga importi i lëndëve të para nga vendet me të cilat nuk ka lidhur marrëveshje të tregtisë së lirë, kështu që 87 për qind e litiumit vjen nga Australia dhe 68 për qind e kobaltit nga Republika Demokratike e Kongos.
“BE nuk duhet të përfundojë në pozitën e varur në rastin e baterive, siç e gjeti veten në rastin e gazit natyror,” tha Annemie Turtelboom, autorja kryesore e raportit.
Auditorët paralajmërojnë gjithashtu se Komisioni nuk ka një pasqyrë të subvencioneve në sektorin e prodhimit të baterive, të cilat aktualisht arrijnë në rreth tetë miliardë euro, njoftoi ECA.
Nëse prodhimi vendas i baterive rritet më pak se parashikimi, BE-ja mund të detyrohet të importojë pasi ndalimi i shitjes së automjeteve të reja me motorë me djegie të brendshme hyn në fuqi në vitin 2035.
Një pjesë e konsiderueshme e importeve ndoshta do të vinte nga Kina, e cila aktualisht përbën 76 për qind të kapacitetit prodhues global. Një zgjidhje alternative do të ishte shtyrja e ndalimit, vëren agjencia dpa. /tesheshi.com/
