Partia e Ali Ahmetit ka nisur shenjat e para të një përplasje me qeverinë e partnerit Nikolla Gruevski. Në mesin e krizës politike, aleati kryesor qeverisës tregon dhëmbët për një nga ligjet bazike.
Deputetët e BDI-së nuk do të përkrahin ligjet për letënjoftim dhe për regjistrim të vendbanimit dhe vendqëndrimit. Kjo u bë e ditur sot nga deputeti dhe nënkryetari i Parlamentit, Rafis Aliti.
“Një ligj të atillë nuk do të përkrahim, që do të thotë gjithsesi se nëse vijnë në rend dite në fazën e dytë në seancë plenare, ne do të përdorim dhe votimin e Badenterit që do të thotë nuk do ta votojmë dhe me automatizëm ai ligj nuk do të kalon. Sa i përket ligjit për vendbanime, gjithsesi se jemi në bisedime me partnerët e koalicionit dhe jo rastësisht sot seance për sistem politik u ndërpre”, deklaroi deputeti Aliti. Këto dy ligje janë diskriminues për mërgatën shqiptare, sepse përmes tyre planifikohet shlyerja e të gjithë mërgimtarëve shqiptarë nga evidence e vendbanimit, në rast se ata qëndrojnë më tepër se tre muaj jashtë vendit.
