Gjysmë ore para se kreut të VMRO-DPMNE-së, Nikolla Gruevski t’i skadojë afati i mandatit për formimin e qeverisë, ka përfunduar dhe e dyta mbledhje maratonike e Kryesisë Qendrore të BDI-së.
Dhe nga ajo që kumtoi zëdhënësi i BDI-së, Bujar Osmani para mediumeve, është bërë të ditur se nuk do të ketë qeveri brenda afatit që pritej, pra orës 24.00
Ai tha se BDI vlerëson se ende nuk është shterur debati që të mund të dalë me vendim përfundimtar për njërën nga pesë opsionet e mundshme të cilat i ka shtruar paraprakisht në tavolinë.
“Pas një debati të gjatë, Kryesia Qendrore ka vlerësuar se ende nuk janë shterur të gjitha argumentet për cilin do nga pesë opsionet e mundshme të cilët i kemi shtruar paraprakisht në tavolinë. Për ne gjithashtu gjatë debatit ka qenë e rëndësishme që të vëmë si kusht për formimin e qeverisë edhe platformën e përbashkët të partive shqiptare. Vlerësoj se më i rëndësishëm është vendimi i duhur se vendimi në kohë”, deklaroi Bujar Osmani, zëdhënës i BDI-së.
Por ndërsa deklaroi kështu, ai bëri sikur harroi që VMRO-së tashmë i ka kaluar afati kushtetuese për formimin e qeverisë së re. Që do të thotë se Gruevski duhet t’ja dorëzojë mandatin rivalit të tij, Zaevit.
Kështu, BDI bën historinë në ditët më të errëta të saj sa i përket prestigjit politik ndër shqiptarë, duke vendosur që ta çojë në opozitë aleatin disavjeçar, VMRO-në, gjithnjë nëse i referohemi asaj çfarë parasheh Kushtetuta maqedonase. /tesheshi.com/
