Në Gjermani, problemet me azilkërkuesit e shumtë që aplikojnë për qëndrim në këtë vend, nuk kanë të mbaruar dhe ka shtete që duket se nuk kanë më resurse për të mbajtur nën kontroll fluksin. Shteti i Bavarisë, si raporton Deutsche Welle, kërkon të bëjë ndarjen e azilkërkuesve. Sipas kryeministrit të këtij shteti, Horst Seehofer, 40 përqind e kërkesave për azil në Gjermani bëhen nga njerëz nga vendet e Ballkanit. Por, thotë ai, kuota e aprovimit të kërkesave të tyre është gati zero.
Megjithatë autoritetet duhet t’i marrin në shqyrtim kërkesat dhe komunat duhet t‘i strehojnë fillimisht azilkërkuesit. Shpesh ato ndjehen të mbingarkuara. Kjo e bën Seehofer të flasë për “shpërdorim masiv të azilit”.
Në këtë mënyrë, Bavaria kërkon të bëjë ndarjen, azilkërkuesit me pak mundësi për pranim duhet të dërgohen në dy kampe të ndërtuara enkas për to pranë kufirit. Këtu bëjnë pjesë kryesisht njerëz nga vendet e Ballkanit e sidomos nga vendet që konsiderohen vende të sigurta origjine si Serbia, Maqedonia dhe Bosnja e Hercegovina.
Bavaria, thotë DW, do t’i kishte klasifikuar me gjithë qejf edhe Shqipërinë, Malin e Zi dhe Kosovën si “të sigurta” dhe do të shqyrtojë edhe nëse mund të shtohet edhe ndonjë vend tjetër, “sidomos shtete afrikane”.
Në mënyrë të ngjashme argumenton tani edhe Enti Federal për Migracion dhe Refugjatë që ka qëndruar i tërhequr për një kohë të gjatë. Presidenti i tij Manfred Schmidt tha për gazetën “Donaukurier”, se “numri i madh i refugjatëve pa perspektivë nga këto vende na bllokon forcat, që na duhen për t’u kujdesur për njerëz nga zonat e krizave”.
Duke filluar nga muaji i ardhshëm ky ent, sipas Schmidt, “do të mund të pajisë me ndalim rihyrjeje në zonën e Shengenit dhe me ndalim të qëndrimit në Gjermani azilkërkuesit me kërkesa të pabaza për azil”. /tesheshi/
