Pas bastisjeve nga policia të shtëpisë së deputetëve Albin Kurti e Donika-Kadaj-Bujupi ndaj të cilëve ka lëshuar dhe urdhër-arrest, ka reaguar Vetëvendosje duke thënë se këto veprime të organeve të rendit dhe drejtësisë janë të orkestruara nga “Klani Pronto”, dhe tregojnë për luftën e vazhdueshme që po i bëhet atyre.
“Pa dyshim, kryefjala e gjithë këtij procesi të padrejtë është gjyqtari Beqir Kalludra, i cili si shërbyes i zellshëm i krimit, ditë më parë dënoi me 21 vite burg katër aktivistët tanë pa asnjë provë të vetme. Ky gjyqtar i cili shquhet vetëm për shërbimin me përkushtim ndaj klanit Pronto, me veprime të tilla, është manifestimi më i mirë i sistemit të kapur të drejtësisë”, thotë VV.
Sipas VV “Klani Pronto” dhe “Pronto 2” siç e quajnë LDK-në po tentojnë të minimizojnë fitoren që arritën në zgjedhjet lokale.
“4 aktivistët e Lëvizjes u dënuan padrejtësisht përmes një masakre juridiko-politike të premten, më pak se dy ditë para balotazhit. Tash deputetët tanë po persekutohen vetëm 3 ditë pas balotazhit. Këto përndjekje tregojnë panikun që i ka kapluar këto struktura kapëse të shtetit nga zgjimi qytetar. Ne kërkojmë që përndjekja ndaj deputetëve dhe aktivistëve tanë të marrë fund. Veprimet e tilla me qëllim frikësimin apo pengimin e aktivitetit të Lëvizjes Vetëvendosje do të jenë përherë të paefektshme. Beteja jonë për ta çliruar sistemin e drejtësisë sikurse lufta për ta ndërtuar një shtet zhvillimor dhe të drejtë e të barabartë për të gjithë, nuk ndalen dot. Ne do të angazhohemi me përkushtimin më të lartë për të ndërtuar institucione të mirëfillta të drejtësisë, para të cilave do të jepet llogari për të gjitha këto veprime”, thotë VV. /tesheshi.com/
