Kreu i PD-së, Lulzim Basha ishte në Kavajë, në një fushatë për të mobilizuar elektoratin për protestën e 18 shkurtit.
Në qytetin ish-bastion të demokratëve, që u humb po me një ish-demokrat, Elvis Rroshin, të rezultuar më pas me kartelë kriminale, Basha tentoi ta ngacmonte ndërgjegjen kavajase pikërisht në këtë pikë, pa harruar ta përkëdhel në të kaluarën e vet antikomuniste.
“Ky është një qytet i madh, me një zemër të madhe. Dhe nuk ka si të jetë ndryshe, shpirti i një komuniteti që u ngrit i pari, sfidoi terrorin, sfidoi frikën dhe me kurajo e mposhti atë. Ata që për 50 vjet e sunduan Shqipërinë me gënjeshtra, me mashtrime, me frikë, me terror dhe me varfëri kurrë nuk ia falën Kavajës këtë. Ata donin me çdo kusht ta poshtëronin Kavajën, t’ia ulnin kokën, ndaj vendosën t’i vënë në krye një fytyrë, një njeri që nuk ka asgjë të përbashkët me kavajasit e vërtetë, nuk ka asgjë të përbashkët me Josif Budon apo me Indrit Carën, dy heronjtë e fundit të Kavajës, njëri hero i demokracisë, tjetri hero i lirisë kombëtare”, tha Basha. /tesheshi.com/
