Lulzim Basha i është përgjigjur Donald Lu-së, duke i thënë se Kryeprokurori i përkohshëm nuk është zgjidhje që mund ta pranojë opozita, pasi ajo kërkon që ai i riu të kalojë nga vettingu, nga Këshilli i Lartë i Prokurorisë dhe të votohet me 3/5-at.
Por deri atëherë? Për Bashën një zgjidhje më e mirë është Llalla, i cili përpos së gjithave nuk është i kapur nga mazhoranca.
“Që Prokurori i Përgjithshëm të mos jetë produkt i politikës, ai nuk mund të përzgjidhet dhe emërohet nga Edi Rama dhe Sajmir Tahiri, por nga Këshilli i Lartë i Prokurorisë dhe tre të pestat e Kuvendit siç e kërkon Kushtetuta.Reforma në drejtësi është në Kushtetutë. Nuk ka reformë në drejtësi jashtë Kushtetutës. Drejtësia arrihet pikërisht përmes zbatimit të Kushtetutës dhe jo pazareve partiake”, thekson kryetari i PD-së.
Basha, madje shton se ka tetë muaj që mbahet peng ngritja e organeve të reja të vettingut dhe drejtësisë së re.
Dhe këtu lideri i opozitës ka një farë të drejte. Ka më pak se tetë muaj. Por vetëm në prill PD dërgoi njerëzit e tij për të zgjedhur organet e vetingut në Kuvend, pikërisht në kohën e çadrës. Madje PD çoi në Kushtetuese dhe Venecia ligjin e vettingut çka nuk bëri tjetër vetëm shtyu konstituimin e institucioneve si KLP-ja.
Por ka edhe më.
Para dy javësh, Lulzim Basha dhe Monika Kryemadhi deklaruan se “vettingu dhe reforma në drejtësi ka vdekur”.
Këtë deklaratë, Basha e bëri pikërisht kur mazhoranca nuk pranoi që të arrestohet Saimir Tahiri. Por a mund të futej në proces PD për të zgjedhur Kryeprokurorin e ri të përkohshëm.
Natyrisht mund ta bënte dhe duke vendosur kushtet e saj. Atëherë, nëse mazhoranca do të tregohej arrogante kishte më shumë të drejtë morale që të mbronte këtë qëndrim. Pra Llalla, vetëm atëherë mund të ishte e keqja më e vogël. /tesheshi.com/
