Lideri i opozitës, Lulzim Basha, i pranishëm në një aktivitet elektoral në Malësinë e Madhe deklaroi para qytetarëve se 21 qershori është dita e dinjitetit të tyre.
Sipas Bashës, “era e mortit”, siç i thonë anembanë vendit, erdhi në Malësi para 2 vitesh dhe i varfëroi njerëzit e iu vërsul dinjitetit, gjësë më të madhe që kanë shqiptarët.
Për kreun e opozitës, dyshja Rama-Meta e shumëzuan me zero dinjitetin e shqiptarëve dhe vetëm një bandë që e konsideron popullin turmë pa tru, mund të bëjë çmimin më të lartë në rajon, taksat më të larta në rajon, pagat, pensionet dhe të ardhurat më të ulëta në rajon.
“E bënë sepse gjetën rrugën më të thjeshtë ti binë popullit, të rrisin taksat. Krimi i veshur me pushtet dhe korrupsioni janë shkaqet kryesore pse po rrënohet Shqipëria. Ttradita e Malësisë do ti përjashtonte nga kuvendi i burrave këta dredhakeq. Oferta jonë për daljen nga qorrsokaku është ulja e çmimit të energjisë dhe kjo do të sjellë frymëmarrje në ekonominë e familjeve dhe të vendit”,- deklaroi kreu i PD-së.
Më tej, Lulzim Basha tha se qytetarët do të zgjidhin mes ofertës së PD për uljen e çmimeve të mallrave të shportës, subvencione për bujqësinë dhe blegtorinë, rritjen e pensioneve dhe rrogave për banorët e Malësisë së Madhe dhe jo emigrimin e pushtetit vendor në kulisat e oligarkisë në Tiranë.
“E patë se çfarë plani djallëzor kanë. Duan që ju të kaloni përmes sekserëve të pushtetit në mënyrë që tu merret palca e kockës e pastaj tu jepet ndonjë gjë malësorëve. Dita e vendimmarrjes me vote po afron, ata nuk i ikin dot. Me hile e filluan, me hile e vazhduan, me hile mendojnë se do t’ia hedhin. Harruan se do të vijë ora e të vërtetës, e votës. 21 qershori është dita e dinjitetit tuaj”,- tha ndër të tjera lideri opozitar
