Kreu demokrat Basha i ka kthyer një përgjigje të shkurtër “dërguesit të letrave” karshi tij, kryeministrit Rama, jo drejtpërdrejtë por tërthorazi, duke i bërë me dije se nuk ia pranon ofertat për dialog.
“Nuk ka kthim pas”, përfundon një mesazh i Bashës, shoqëruar me një foto që përcjell dhe një imazh të kuruar të opozitës, e shënjestruar nga ndërkombëtarët si nxitëse dhune.
Edhe fjalët e para të një mesazhi të tij, nisin me një miklim ndaj Perëndimit, që deri më tani nuk jep asnjë mbështetje për aksionin politik të zgjedhur – në rrugë, me mandate të djegura dhe me bojkot zgjedhjesh.
“Ne jemi Populli i Europës, ne jemi Populli i Lirisë, ne jemi Populli i Demokracisë. Ne jemi njerëz që besojmë në vlera, besojmë tek dinjiteti i njeriut, besojmë tek familja, besojmë tek atdheu.
Demokracinë nuk e japim, të drejtat dhe liritë tona nuk i dorëzojmë. Beteja për to është misioni më i madh dhe më fisnik i njeriut të lirë. Beteja me të keqen, po e çliron dhe fisnikëron shoqërinë dhe kombin tonë.
Forca jonë është bashkimi, forca jonë është qëndresa, forca jonë është përballja deri në fitoren e kësaj beteje për Shqipërinë si gjithë Europa. Asnjë hap pas!”, shkruan Basha. /tesheshi.com/
