“Qeveria shqiptare hoqi dorë nga të gjitha gjyqet civile, por mori përsipër fshehjen dhe ndalimin e ndjekjes penale ndaj Hajsek dhe të tjerëve, pavarësisht se ishin denoncuar nga qeveria “Berisha”.
Kështu tha kreu i partisë Demokratike, Lulzim Basha gjatë fjalës së mbajtur në grupin parlamentar demokrat, fjalë e fokusuar gjerësisht te skandali I CEZ dhe spekulimet e shumta që kanë dalë në qarkullim se kush fshihet e ndaj kujt drejtohet ky skandal. Sipas Bashës, PD nuk do të ndalet në zbardhjen e së vërtetës “as nga diversioni i trashë dhe as i hollë i Ramës dhe i Metës”.
Basha akuzoi qeverinë Rama-Meta se kanë shpërdoruar të paktën 600 milionë euro në marrëveshjen e arritur me kompaninë.
“Ka njerëz që mendojnë se marrëveshja kriminale e 31 korrikut 2014 me CEZ dhe skandali i aferës CEZ-DIA janë dy gjëra të ndryshme, por ato janë të lidhura dhe pjesë e një skandali të vetëm. Lidhja që i bën bashkë është klauzola e ndalimit të çdo kallëzimi, hetimi në proces dhe çdo hetimi të asaj që ka ndodhur gjatë qëndrimit të CEZ-it në Shqipëri. Kjo dhe kalimi në votim në heshtje i shërbyen varrosjes së një krimi të madh financiar”, tha Basha.
Sipas tij, 350 milionë euro fatura të njohura dhe të papaguara nga ana e CEZ ndaj KESH-it dhe OST-së, qeveria shqiptari i fali përmes marrëveshjes me kompaninë çeke. /tesheshi.com/
