Qentë e policisë në Ekuador nuhatën 6.23 ton kokainë të fshehur në një ngarkesë me banane.
Pasi kontrolluan dërgesën, oficerët sekuestruan 5630 pako të mbushura me një lëndë të bardhë, e cila pas kontrollit u konstatua se përmbante kokainë.
Dërgesa ishte e destinuar për tregun gjerman, thanë zyrtarët dhe vlerësohej në 224 milionë dollarë. Autoritetet kanë arrestuar pesë persona të lidhur me tentativën e kontrabandës së drogës, shkruan BBC.
Policia e gjeti kokainën gjatë një kontrolli rutinë të kontejnerëve në portin e Posorja, në jugperëndim të qytetit më të madh të Ekuadorit, Guayaquil. Kontrabandistët fshehën pako me kokainë nën arka me banane.
Një nga të arrestuarit është një përfaqësues i kompanisë së eksportit përgjegjës për dërgesën, i cili më vonë u dha oficerëve emrat e katër të dyshuarve të tjerë. Mes tyre janë drejtuesit e plantacionit të bananeve ku dyshohet se në ngarkesë ishte vendosur kokaina, si dhe shoferi që e çoi kontejnerin në port.
Ekuadori është bërë vendi kryesor i tranzitit për kokainën e prodhuar në Perunë dhe Kolumbinë fqinje dhe grupet kriminale përdorin portet e Ekuadorit për të transportuar drogë në Evropë dhe SHBA.
Vitin e kaluar, forcat e sigurisë ekuadoriane kapën më shumë se 200 tonë drogë, kryesisht kokainë. Në janar, policia gjeti sasinë më të madhe të konfiskuar ndonjëherë në Ekuador – 22 ton kokainë – të fshehur në një fermë derrash. /tesheshi.com/
