Shqipëria nuk iu nda fundit edhe në epilo gun e Lojërave të para Europiane “Baku 2015″. Me dy garat përmbyllëse, notin dhe xhudon, Shqipëria i jep lamtumirën kësaj premiere ndërkombëtare pa histori, shkruan Panorama Sport.
Notari Franc Aleksi konkurroi në garën e 200 metrave stil i lirë, ku në renditjen e përgjithshme u klasifikua i fundit. 16-vjeçari kryeqytetas ishte në baterinë e parë mes 6 notarëve dhe e ndali kohën në 2’01’88. Kjo kohë ishte më e ulëta e baterisë së parë, ndërsa më i pari u rendit bashkëmoshatari i tij nga Kroacia me kohën 1:54.78.
Ndërsa në renditjen e përgjithshme Aleksi zuri vendin e 53-të nga 56 notarë të regjistruar në këtë disiplinë, por që tre nga ata nuk garuan, përkatësisht suedezi Viktor Johanson, polaku Antoni Ksiazek dhe notari norvegjez Ole-Mikal Floegstad. Kohën më të mirë në eliminatore e regjistroi notari rus, 18-vjeçari Elisei Stepanoiv, 1:49.29 (rekord i Lojërave Europiane). Kjo ishte sfida e dytë në këto Lojëra për të riun Aleksi pas pjesë- marrjes së tij në 400 metra stil i lirë, ku arriti kohën 4:19.05. Përtej rezultateve, Aleksi pati mundësinë të fitojë më shumë përvojë. Po dje konkurroi nga Shqipëria edhe xhudisti Igli Ramosacaj në sportin e xhudos.
Në peshën -73 kg, ai u përball me ukrainasin Serhi Drebot në turin e parë, ku u mposht. Të dielën në mbrëmje do të zhvillohet ceremonia e mbylljes së Lojërave ku Shqipëria “ngeli” në klasë në këtë premierë. Nga 9 disiplina sportive: atletikë, boks, çiklizëm, not, mundje, karate, xhudo, taekwondo dhe qitje, “Mbretëresha e Sporteve” me numrin më të madh të atletëve (15 nga 28 në total) ishte e vetmja që nderoi Shqipërinë. Protagonistët ishin Luiza Gega dhe Izmir Smajlaj në 800, 1500 m e kërcim së gjati ku zunë 1 vend të parë e dy vende të dyta. /tesheshi.com/
