Nënkryetari i AKR-së, Agim Bahtiri, ka deklaruar se pavarësisht deklaratave të Lutfi Hazirit se LDK nuk lëviz nga pozicioni politik, Isa Mustafa do t’a dërgojë LDK-në drejt PDK-së. Bahtiri shprehet i bindur se LDK po pret vetëm zgjedhjet lokale për të marrë një vendim të tillë.
“Unë pyes Lutfi Hazirin se nga cili pozicion nuk lëviz LDK? Ju jeni parti politike që qytetarët u kanë votuar për të qeverisur. Për çfarë nuk lëvizni? Këtë ua tregojë unë. Nuk lëvizni për shkak të zgjedhjeve lokale dhe unë ju garantoj se pas zgjedhjeve lokale, ende para mbarimit, do të shkoni aty ku vajtët edhe më 2014”, thotë Bahtiri, i ftuar në emisionin ‘Alo Mirëmëngjesi’
Ai shton se kreut të LDK-së, Isa Mustafës, po i pëlqen që të qëndrojë sa më gjatë në detyrën e kryeministrit duke qeverisur ende me PDK-në.
“LDK e di se ne nuk kemi shkruat te PAN vetëm se aty është PDK. Atëherë pse Isa Mustafa është ende në qeveri me PDK-në? Ai dëshiron të rrijë sa më gjatë aty. Pse nuk i hoqi ministrat e PDK-së nga Qeveria? Pse vazhdon me ta?”, shprehet Bahtiri
Duke folur për opsionin e AKR-së për një qeveri gjithëpërfshirëse, Bahtiri tha se edhe Vetëvendosje është për këtë opsion.
“Shikoni, edhe Vetëvendosja nuk është larg opsionit tonë (qeveri gjithëpërfshirëse), por problemi është Isa Mustafa”, tha Bahtiri.
Ai është pyetur se a ekzistojnë shanset për një bashkëpunim AKR-PAN, ndërsa tha se ne do presim deri më 7 shtator dhe pastaj do të shikojmë se çdo bëjmë.
“Unë mund të them se qëndrimi im personal është: asnjëherë, kurrë, me asnjë çmim me PAN-in. Por, unë nuk mundem që i vetëm të bllokoj atë që mund të ndodhë. Ne si AKR kemi qenë besnikë ndaj çdo koalicioni që kemi lidhur.
Do të jemi besnikë deri në atë shkallë sa njerëzit e kuptojnë kush është fajtor për atë që po ndodhë. Nuk lihet shteti në bllokadë totale për tekat e dikujt dhe kjo është ajo që ne jemi zhgënjyer nga LDK, pikërisht nga Isa Mustafa. Me të vërtet është për të ardhur keq se si mundet ai të personalizojë gjërat, që lidhen direkt me Republikës e shtetin”, thotë Bahtiri. /tesheshi.com/
