Drejtori i Përgjithshëm i Policisë së Shtetit, Drejtues Madhor Haki Çako, inspektoi Pikën e Kalimit Kufitar në Qafë -Thanë, për të parë nga afër zbatimin e masave për sezonin turistik, masat e shtuara për parandalimin e azil kërkimit, bashkëpunimin me policinë maqedonase për parandalimin dhe goditjen e krimit ndërkufitar, krimit të organizuar e trafiqeve të paligjshme.
Kryepolici Çako ka zhvilluar dhe një takim në qendrën e përbashkët për koordinimin e informacionit mes dy policive, ku diskutoi mbi masat edhe me drejtorin për kufirin e rajonit të Ohrit, Xhelal Lata, i cili shoqërohej nga shefi i luftës kundër Krimit të Organizuar dhe Komandanti i pikës kufitare Qafë -Thanë.
Çako dhe Lata kanë vlerësuar bashkëpunimin mjaft të mirë mes dy policive kufitare rajonale, ku ky bashkëpunim duhet marrë shembull për gjithë policitë e tjera.
Gjatë takimit, drejtori për kufirin rajonal të Ohrit ka zbardhur edhe një skemë të re që përdoret tashmë nga azilkërkuesit.
“Më e reja që paraqitet si problematikë: kërkesa e azilkërkuesve, të cilët vijnë nga Shqipëria dhe kalojnë në pjesën e shteteve europiane. Në këtë drejtim bashkërisht kemi hartuar një plan, të cilin po e zbatojmë rregullisht. Kryesisht azilkërkuesit synojnë aeroportin e vogël duke menduar se këtu mund të kalohet më lehtë për shkak të dokumentacioneve të dyfishta që kanë. Dy javët e fundit janë kapur dy persona shqiptarë, të cilëve në kontrollet e bagazheve të tyre iu gjetën edhe dokumente origjinale shqiptare”, tha Lata.
Në vijim ai shtoi se këtë luftë ne do ta vazhdojmë bashkërisht dhe do të jetë dhe më tepër rigoroze, pasi në të ardhmen ata shkelës që kapen do të marrin dënimin e duhur.
Në anën tjetër, Drejtori i Përgjithshëm i Policisë së Shtetit, Haki Çako, tha se së bashku do vazhdojmë kontributet për t’ju bërë të qartë atyre se azilkërkimi është një fenomen i cili nuk ekziston, e drejta për të përfituar në këtë mënyrë është zero dhe do të vazhdojë të jetë zero.
“Ne u tregojmë dhe i orientojmë ata se ka forma të vazhdueshme ligjore, përmes kontratave ligjore të punës nëpërmjet Ministrive përkatëse”, tha Çako. /tesheshi.com/
