Ndërsa aktualisht Demarkacioni dhe Asociacioni janë temat kyçe, politika kosovare brenda tre muajsh pritet të ballafaqohet me një sfidë tejet të madhe. Fjala është për Gjykatën Speciale ku “peshq të mëdhenj”, siç njihen tashmë politikanë të nivelit të lartë pritet të ballafaqohen me të.
Ende askush nuk e di saktë kur do ngriten akuzat e para. Por avokati Tomë Gashi, që pritet të jetë njëri nga mbrojtësit e të akuzuarve potencial të Speciales, thotë se akuzat e para priten të ngritën para muajit qershor, derisa bën të ditur se është në kontakt me personat që mund të jenë të akuzuar.
“Aktakuzat e para mund të ngrihen para qershorit 2017 dhe çështja ka mbetur teknike pas zgjidhjes së 19 gjyqtarëve të Gjykatës Speciale dhe ata gjyqtarët së bashku me prokurorët do të kenë konferenca për të vendosur lidhur me procedurat dhe provat, pastaj ky dokument nga një panel të këtyre gjyqtarëve të Gjykatës Speciale që veprojnë si panel i Gjykatës Kushtetuese, do të vlerësojnë kushtetutshmërinë e këtyre dokumenteve dhe pas kësaj Gjykata do të jetë e gatshme, që të fillojë gjykimet pas ngritjes se aktakuzave të para nga prokurori z.Schwiederman”, ka thënë Gashi, në një intervistë për gazetën “Bota Sot”.
Dhomat e specializuara të kësaj gjykate do të trajtojnë çështjet që dalin nga raporti i Dick Martit, i cili u shndërrua në raport të Këshillit të Evropës dhe fajëson ish-pjesëtarë të UÇK-së, për krime lufte përfshirë edhe trafikim të organeve njerëzore.
Kryeprokurori i Speciales, David Schwendiman, ka thënë se askush nuk ka imunitet për të mos u ndjekur penalisht për shkelje të së drejtës humanitare ndërkombëtare. /tesheshi.com/
