Uashingtoni i ka kërkuar (mund ta imagjinojmë se në ç’mënyrë) qeverisë greke të përshpejtojë projektin e tubacionit të gazit TAP, i cili do të lejojë që Europa të shfrytëzojë pasuritë e Azerbajxhanit me gaz dhe të përdorë më pak gazsjellësin rus “Turkish Stream”.
Siç shkruan “Voice of Russia”, i dërguari i departamentit të Shtetit të SHBA-ve për Energjinë, Amos Hochstein ka diskutuar një sërë çështjesh në lidhje me energjinë më kolegët grekë gjatë vizitës së tij në Athinë.
Hochstein ka theksuar se për momentin Rusia është furnizuesi më i madh me gaz për Europën, ndërsa për kontinentin dhe për Greqinë është shumë i rëndësishëm diversifikimi i burimeve të furnizimit.
“Në një analizë të fundit, diversifikimi është mënyra më e mirë për të garantuar sigurinë e burimeve. Kjo do të thotë se ju duhet të lejoni që të merrni gazin edhe nga burime të tjera, të cilat nuk janë ruse, për të krijuar mundësinë e konkurrencës”,- është shprehur diplomati amerikan.
Sipas Hochstein, projekti i gazsjellësit azerbajxhanas garanton sigurinë energjetike me të gjitha parametrat si dhe sjellin një burim të ri, një furnizues të ri dhe një treg të ri.
Greqia ka deklaruar se kërkon diversifikimin e burimeve të gazit, por Athina i konsideron raportet me Moskën si pjesë të këtij procesi./tesheshi.com/
