Policia e Durrësit dhe ajo e Shijakut kanë mundur të zbardhin atentatin që iu bë dje biznesmenit Dashamir Gjoka, në momentin kur ai dhe familjarë të tij po lëviznin me një automjet të blinduar.
Policia bëri të ditur se janë identifikuar autorët, të cilët dyshohet se qëlluan me armë zjarri në drejtim të mjetit tip Benz, ndërsa po punohet për arrestimin e tyre.
Sipas një njoftimi zyrtar, ata janë shtetasit E.K, 32 vjeç, dhe M.K, 36 vjeç, banues në Shijak.
“Këta shtetas, vëllezër më njëri-tjetrin, më datë 23.08.2017, në vendin e quajtur”Komuna Xhafzotaj”, Shijak, dyshohet se duke lëvizur me një mjet tip Benz kanë qëlluar me armë zjarri automatik automjetin e blinduar (po në lëvizje) që drejtohej nga shtetasi D. Gj. 46 vjeç, banues në Shijak”, thuhet në njoftimin e policisë.
Në vijim sqarohet se gjatë kqyrjes në vendin e ngjarjes, u fiksuan në cilësinë e provës materiale 26 copë gëzhoja, model 56, kalibër 7.62 mm.
“Në cilësinë e provës materiale është bllokuar dhe mjeti tip Benz, në të cilin dyshohet se kanë qenë autorët e dyshuar.
Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale ”vrasja në rrethana të tjera cilësuese”në bashkëpunim e mbetur në tentativë, dhe ”prodhimi dhe mbajtja pa leje e armëve luftarake dhe e municionit”, parashikuar në nenet 79,22,25 dhe 278 të Kodit Penal. /tesheshi.com/
