Incident i rëndë në Kumanovë. Gjatë ditës së sotme është qëlluar me armë zjarri Xhemail Rexhepi, një nga drejtuesit e Bashkimit Demokratik për Integrim të zonës, i cili është në garë edhe për tëe drejtuar degën pas shkrirjes që u bë në maj, kur ndodhi ngjarja në “Lagjen e Trimave”.
Siç njofton bashkëpunëtori i tesheshi.com në Kumanovë, ish-komandanti i Ushtrisë Çlirimtare Kombëtare gjatë konfliktit të vitit 2001, i njohur me nofkën komandant “Shqiponja” ka humbur jetën pa mbërritur në spital.
Burimet flasin për një përplasje në lidhje me garën që po zhvillohej për kryetar të PDI-së. Siç mësohet, në përplasjen e armatosur që ka ndodhur në rrethana ende të pasqaruara është qëlluar edhe Shefki Rexhepi, mik dhe ish-bashkëluftëtar i komandant “Shqiponjës” i cili ndodhej bashkë me të në momentin e sulmit.
Rexhepi është dërguar menjëherë në spitalin universitar të Shkupit për intervenim të shpejtë. Përplasja ka ndodhur në një bar të qytetit të Kumanovës, ku sipas të dhënave Rexhepi është takuar me Bajram Limanin, personin e komanduar nga kreu i BDI-së si drejtues i degës. Të dy do të flisnin në lidhje me garën për kryetar. Flitet se ka edhe të plagosur të tjerë.
Menjëherë pas ngjarjes, qytetarë të shumtë janë mbledhur në lokalin ku ka ndodhur vrasja dhe kanë nisur të kërkojnë llogari nga policia për kapjen e vrasësve. Deri tani Ministria e Brendshme nuk ka një deklaratë për autorët por thjesht ka bërë një konstatim se komandant Shqiponja ka vdekur.
Automjeti i goditur nga plumbat ku ndodhej Xhemail Rexhepi ndodhet ende në vendin e ngjarjes. Ndërkohë, familjarë dhe miq të komandant Shqiponjës janë mbledhur para spitalit të Kumanovës, ku po pritet që të merret kufoma e të ndjerit.
Familjarët kanë konfirmuar se Xhema është i vrarë, ndërsa në gjendje shumë të rëndë është kusheriri i tij Shefki Rexhepi dhe shoku i tyre Gani Demiri.
Ministria e Brendshme thekson se autorë të sulmit që vrau komandant Shqiponjën janë dy persona. Sipas informatave, autorët kanë qëlluar fillimisht Shefki Rexhepin, kurse në momentin që komandant “Shqiponja” ka ndërhyrë për të zbutur gjakrat kanë zbrazur breshëri plumbash mbi trupin e tij, duke i shkaktuar plagë vdekjeprurëse. Mendohet se kanë qëlluar edhe persona të tjerë që kanë ardhur të hipur mbi motoçikleta, por gjithçka pritet të bëhet e ditur në orët në vazhdim.
/tesheshi.com/
