Lajmi për zgjedhjen e Hashim Thaçit president i Kosovës nuk ka gëzuar vetëm prindërit e tij që kanë festuar në Burojë të Skenderajt, djalin Endritin, gruan Lumnijen, përkrahësit e PDK-së në mbarë vendin, por i ka bërë të buzëqesh edhe të gjitha figurat më të larta të partisë.
Një gjë të tillë e dëshmon edhe një fotografi që është shkrepur pasi Thaçi mori votat e deputetëve për të parin e vendit.
Megjithatë, njeriu që më së shumti mund të jetë gëzuar padyshim se është ish-kreu i Shërbimit Informativ të Kosovës, Kadri Veseli, tani kryetari aktual i Kuvendit të Kosovës.
Kjo u pa edhe pas zgjedhjes së presidentit, kur dy figurat më të larta të PDK-së ia shtrijnë miqësisht dorën njëri-tjetrit.
Ishte Thaçi që shkoj tek ulësja e kryekuvendarit Veseli dhe kapi përqafe shokun e tij të ngushtë.
Ndoshta, heshturazi ka dashur t’i thotë në vesh: “shoku Kadri, tash e ke radhën ta marrësh timonin e partisë”.
PDK nga muaji prill do t’i duhet të ketë udhëheqës të ri dhe sigurisht ai do të jetë pikërisht Veseli, zv.kryetar aktual i partisë, i cili brenda një kohë shumë të shkurtër pasi u bë zyrtarisht anëtarë i PDK-së kërceu dhe zuri ulësen kryesore të tempullit të demokracisë.
Hashim Thaçi, me marrjen e postit të shefit të shtetit detyrohet që sipas Kushtetutës të japë dorëheqje nga udhëheqja e partisë të cilën e formoi në vitin 1999.
Duke parë ndikimin e madh të Veselit në PDK, ai pritet që me shumicën absolute të votave të zë karrigën në të cilën u ul Thaçi për më shumë se 16 vite.
Andaj, me të drejtë Kadri Veseli ishte njeriu më i buzëqeshur dhe i lumtur pasi që Thaçi u zgjedh kryetar i shtetit.
Ndryshe, nuk do të ishte aspak e çuditshme nëse ish-kreu i SHIK-ut brenda një kohe jo të gjatë të zë edhe karrigen që për shtatë vite e mbajti Thaçi, atë të kryeministrit, pozitë të cilën aktualisht e mban kreu i LDK-së Isa Mustafa.
Nëse vendi shkon në zgjedhje dhe sondazhet për partite dalin të jenë të vërteta ku PDK-në e rendit të parën, atëherë Veseli si kryetar i partisë që fiton zgjedhjet mund të bëhet edhe kryeministër i Kosovës.
Ndoshta, edhe ëndërr e kahmotshme e dy shokëve, Thaçi e Veseli, ka qenë që një ditë të vijnë në pozitat më të larta drejtuese të shtetit.
Thaçi ia arriti qëllimit, kurse për Veselin duhet pritur …
Përgatiti: Blendi Gashi – /tesheshi.com/
