Policia arrestoi 3 shtetas nën akuzën e zjarrëvënies në pyllin e Krrabës, mbi tunelin që lidh Tiranën dhe Elbasanin.
Në pranga kanë rënë Armand Ukaj, 22 vjeç, Oltjan Deda, 26 vjeç, dhe G.P, 17 vjeç, të tre banues në fshatin Krrabë .
Arrestimi i këtyre personave u bë pasi, më datë 06.08.2017, mbi tunelin e Krrabës, kishin hapur disa gropa për të bërë qymyr, ku për pasojë është përhapur zjarri në pyll, i cili vazhdon prej 3 ditësh dhe janë djegur mbi 15 hektar pyje (lisa, mare, dushk).
Shërbimet e policisë vazhdojnë punën në bashkëpunim me Emergjencat Civile, PMNSZH dhe forcat e Armatosura për fikjen e zjarrit.
Materialet u referuan në Prokurorinë e Rrethit Gjyqësor Tiranë, në ngarkim të shtetasve të lartpërmendur, për veprën penale ” Shkatërrim me zjarr i pyjeve dhe i mjedisit pyjor”, parashikuar nga neni 206/b dhe 25 i Kodit Penal. /tesheshi.com/
