Një gjykatë moldave ka çuar ish-presidentin dhe liderin e opozitës pro-ruse Igor Dodon në arrest shtëpiak 30-ditor për të lejuar prokurorinë të hetojë akuzat për korrupsion dhe tradhti.
Gjykata e qarkut në distriktin Chiocana të kryeqytetit Chisinau vendosi dy ditë pasi shtëpia e Dodonit u kontrollua dhe ai u urdhërua në paraburgim 72 orësh, raporton Reuters.
Duke iu drejtuar mediave pas seancës gjyqësore, Dodon tha se gjyqtari po zbatonte “urdhrin politik” të presidentes pro-perëndimore Maia Sanda, e cila e pasoi atë në fitoren e zgjedhjeve të 2020.
Ai tha se nuk ka pronë tjetër përveç asaj që ka raportuar zyrtarisht.
Qeveria hodhi poshtë akuzat për ndërhyrje politike dhe ministri i drejtësisë Sergiu Litvinenko tha se çështja do të drejtohej “rreptësisht në përputhje me ligjin”.
Arrestimi i Dodonit vjen në një kohë kur marrëdhëniet mes Moskës dhe Kishinjaut po bëhen gjithnjë e më të tensionuara.
Kremlini ka shprehur më parë shqetësim për lajmin se Dodon është arrestuar, ndaj dhe zëdhënësi Dmitry Peskov u bëri thirrje autoriteteve moldave të respektojnë të drejtat e tij.
Në muajt e fundit, separatistët rusë në rajonin e Transnistrisë të Moldavisë kanë fajësuar Ukrainën fqinje për “të shtëna, shpërthime dhe sulme me dron”, duke rritur frikën se Moldavia mund të tërhiqet në konfliktin në Ukrainë. /tesheshi.com/
