Në konferencën e Brukselit “Mbështetje për të Ardhmen e Sirisë dhe Rajonit”, bashkësia ndërkombëtare premtoi 5.3 miliardë euro ndihmë për Sirinë, por edhe për vendet fqinje që morën numrin më të madh të refugjatëve sirianë.
Nga kjo shumë, Bashkimi Evropian do të ndajë 3.7 miliardë, nga të cilat 1.12 miliardë vijnë nga Komisioni Evropian dhe 2.6 miliardë nga vendet anëtare të BE.
Brukseli deklaron se BE në tërësi mbetet donatori më i madh i ndihmës humanitare për Sirinë, me 24.9 miliardë euro të alokuara që nga fillimi i krizës në 2011.
Konferenca e pestë me radhë kushtuar Sirisë u organizua në 29 dhe 30 mars në Bruksel nga BE dhe Kombet e Bashkuara.
Mbi 80 vende dhe organizata ndërkombëtare morën pjesë, duke u përqëndruar në situatën aktuale në Siri dhe rajon dhe mbështetur përpjekjet e drejtuara nga KB për një zgjidhje gjithëpërfshirëse politike të konfliktit në përputhje me Rezolutën 2254 të Këshillit të Sigurimit të KB.
Ndihma e premtuar, megjithatë, është më e ulët se ajo e kërkuar nga KB, e cila bëri thirrje për të paktën 4 miliardë dollarë ndihmë për Sirinë dhe 5.8 miliardë të tjerë për pothuajse gjashtë milion refugjatë sirianë të luftës.
Departamenti i Shtetit tha se nga ndihma do të përfitonin njerëz në Siri dhe refugjatë në Turqi, Liban, Jordani, Iraku dhe Egjipt.
Më shumë se gjysmë milioni njerëz vdiqën në Siri gjatë luftës dhe qëndrimi i miliona refugjatëve destabilizoi vendet fqinje dhe shqetësoi Evropën.
Ministri i Jashtëm gjerman Heiko Maas premtoi 1.73 miliardë euro dhe tha se ndihma për Sirinë ishte “angazhimi më i rëndësishëm” i vendit të tij, ndërsa Britania e Madhe uli sasinë e ndihmës në 205 milion paund, ndërsa vitin e kaluar dha 300 milion. /tesheshi.com/
