Ish-zv.kryeministri Arben Ahmetaj, i shpallur në kërkim ndërkombëtar nga SPAK, ka vetëshpallur pafajësinë e tij nga arratia.
Si një rast i paprecedent, ai deklaron se janë pikërisht amerikanët ata që kanë vërtetuar të qënit e tij i pastër nga çdo akuzë.
Ahmetaj bën me dije se ka kontraktuar firmën ligjore amerikane “Nixon Peabody” për të shqyrtuar raportin që Prokuroria e Posaçme i dorëzoi Kuvendit për heqjen e imunitetit të tij.
“Në vazhdën e persekutimit politik për më shumë se një vit e gjysëm, të vazhduar e orientuar në media (të financuara nga inceneratorët) dhe në institucionet e akuzës, u detyrova të kërkoja një Opinion të dytë të pavarur (Indipendent Second Opinion) nga një firmë ligjore ndërkombëtare me qendër në SHBA.
Firma ligjore ‘Nixon Peabody’ mori në shqyrtim të gjithë raportin e SPAK paraqitur në kërkesën që ky i fundit dorëzoi në Kuvend për heqjen e imunitetit parlamentar. Firma ligjore ‘Nixon Peabody’ pas disa muajsh punë me bashkëpunëtorë me eksperiencë të fushës (ish-prokurorë federalë, apo ish-investigatorë të institucioneve ligjzbatuese amerikane) kanë prodhuar një raport të gjatë prej 420 faqesh duke u bazuar në standardet ndërkombëtare, prezumimin e pafajësisë dhe të drejtat themelore të njeriut”, shkruan ai në FB, duke vijuar:
“Në raport ka dhe një përmbledhje prej 38 faqesh, ku bie në sy një nga konkluzionet e ‘political motivation or others…’, pra sulme te orientuara politikisht, për akuzat e ngritura ndaj meje, përmbledhje e cila mund të lexohet lehtësisht nga kushdo i interesuar.
Këtë raport ia kam dërguar Ministrit të Drejtësisë, Kryetares së Kuvendit, Kryeinspektorit Metani, si dhe disa përfaqësive të huaja të shteteve dhe institucioneve që kanë kontribuar në reformën në drejtësi.
Më poshtë kam atashuar linkun e materialit të plotë, i cili është lehtësisht i aksesueshëm.
Tashmë nuk kam më as habi, e as çuditem nga goditjet e orientuara, të kaluara, të tashme e të ardhme. Nuk kam çudi as nga standardet e aplikuara. Në të ardhmen e afërt do të komunikoj në detaje për akuza/supozime e përtej…”.
E megjithatë, ish-numri dy i qeverisjes i bën avokatinë vetes duke iu shmangur drejtësisë me arrati. Së këndejmi, ai është i deligjitimuar nga çdo lloj procesi jashtë procesit që e nxjerr të pafajshëm. /tesheshi.com/
