Mediat britanike thuajse e bëjnë të sigurt lajmin që trajneri i ri i londinezëve të Chelsea-t do të jetë italiani Antonio Conte, i cili tani për tani gjendet në krye të kombëtares së vendit të tij.
Daily Mail flet për bisedime në 48 orët e fundit mes përfaqësuesve të Conte-s dhe krahut të djathtë të presidentit të Chelsea-t, ruses Marina Granovskaia, e cila po merret posaçërisht me gjetjen e emrit të ri për stolin e ekipit.
Antonio Conte, duke iu referuar burimit të mësipërm, kërkon një kontratë trevjeçare, me një pagesë prej 6 milionë paundësh në sezon, shumë të cilën klubi është i gatshëm ta paguajë. Sa i përket kontratës, ende nuk është e qartë nëse do të ketë një të tillë trevjeçare, apo dyvjeçare me mundësi zgjatjeje një vit më tepër.
Marrëveshja mes teknikut të suksesshëm italian dhe klubit londinez të Chelsea-t pritet të miratohet dhe të nënshkruhet në parim muajin e ardhshëm. Conte, siç mësohet, do të jetë në gjendje të shpenzojë 150 milionë paundë për blerjen e lojtarëve të dëshiruar prej tij, por njëkohësisht do t’i kërkohet t’u kushtojë një vëmendje të posaçme futbollistëve të rinj.
Massimiliano Allegri dhe Diego Simeone kanë qenë deri më sot dy emrat më të lakuar në shtyp si pretendentë për t’u ulur në stolin e Chelsea-t. Historia duket të ketë marrë rrjedhë tjetër, me Conte-n të cilit i mbaron kontrata me përfaqësuesen italiane në verën e këtij viti. /tesheshi.com/
