-Profili i gruas më të fuqishme të botës, e cila sot viziton Tiranën-
Nga Ylli Pata
Kancelarja gjermane Angela Merkel, është një politikane që ka lindur në Perëndim, por që ka jetuar në Lindje, duke u kthyer në simbolin e ri të një Gjermanie të Bashkuar, e cila ia arriti të integrojë në mënyrë të shpejtë një shoqëri të ndarë për 50 vjet.
Angela Dorotea Kasner, siç është emri i saj në certifikatën fillestare, përfaqëson një politikane profesioniste, e cila është personifikimi i luftëtares së fortë ndaj ekstremizmit dhe politikave ndarëse, duke ia arritur të sfidojë ekstremet dhe të kthejë në politikë reale moderacionin dhe përafrimin. E ardhur nga ish-Gjermania komuniste e Lindjes, Angela Merkel ka qeverisur tre herë Gjermaninë si Kancelare dhe dy herë si ministre. Nga tre, ajo ka drejtuar dy qeveri koalicioni me rivalin kryesor të saj Partinë Socialdemokrate, duke u kthyer tashmë në një mjeshtre e kompromisit dhe e politikës së moderacionit.
Angela Merkel pas 9 ditësh, më 17 korrik mbush 61 vjeç. E lindur në Hamburg në vitin 1954, familja e saj vetëm pak ditë më pas, u zhvendos në një qytezë të vogël të landit të Brandemburgut në Gjermaninë Lindore, ku babai i saj, një pastor luteran u emërua drejtues i një kishe. Në Republikën Demokratike Gjermane, Merkel e diplomuar dhe e doktoruar për kimi zhvilloi karrierën e saj shkencore por edhe politike në radhët e rinisë socialiste në fillim e më pas duke u tërhequr në aktivitetin shkencor.
Një shkencëtare reale, Merkel është një njohëse perfekte e alkimisë së asaj që përbënte komunizmi ndaj ishte ndër të parat që e kundërshtoi. Ajo është një poliglote, njeh në mënyrë perfekte rusishten, flet anglisht dhe frëngjisht shkëlqyeshëm.
Me afrimin e rënies së komunizmit, Angela Merkel arriti të bëhej zëdhënësja e qeverisë së fundit të Gjermanisë Lindore, e cila përgatiti ribashkimin bashkë me Helmut Kohl-in, kancelarin historik.
Pikërisht në këtë post e pikasi Kohl “vajzën” siç e thërriste dhe e zgjodhi, deputete të Unionit Kristian Demokrat në Bundestagun tashmë të Gjermanisë së Bashkuar(1990) dhe pas si ministre të Gruas dhe Rinisë. Merkel ishte ministrja më e re e Gjermanisë së atëhershme. Në vitin 1994 ajo u emërua sërish nga Kohl si ministre për Mjedisin dhe ruajtjen e reaktorëve Bërthamorë.
Ylli politik i vajzës që vinte nga lindja nuk po njihte zbehje. Edhe pse kristian demokratët humbën zgjedhjet në vitin 1998 përballë një Gerard Shrederi pragmatik, antiamerikan e filorus, Angela Merkel u zgjodh lidere e opozitës, duke fshirë përfundimisht klasën e vjetër politikë të CDU-së, madje edhe “babain” e saj politik, mentorin dhe njeriun që i tha shansin e jetës, kancelarin Helmut Kohl.
Një mos deklarim financimi për partinë, Merkel nuk ia fali Kohl duke vendosur një standard moral përfundimtar në parti dhe menjëherë arriti të bëjë zap një forcë politike me rrënjë konservatore ku burrat dhe lobimi katolik kishte mbizotëruar gjithnjë. Kurse ajo, një grua, protestante që vinte nga lindje ridimensionoi kulturën gjermane të pastërtisë morale, duke e kthyer politikën në një derivat bazë të “Dhjetë Urdhëresave”.
Koha i dha të drejtë dhe Angela Merkel ka fituar tre zgjedhje radhazi, duke u renditur në gruan më të fuqishme të botës sipas Forbes për disa vite radhazi.
Merkel e ka kthyer Gjermaninë në një nga vendet më multikulturale dhe multifetare në Europë ku ekstremizmat mbeten gjithnjë në margjina dhe nuk instalohen në politikën elitare. Ka promovuar dhe luftuar për integrimin dhe paqtimin, siç bëri me dy gjermanitë dhe mbylljen e një plage të gjatë që ne kemi 25 vjet dhe e rihapim thuajse çdo fushatë zgjedhore.
Dy vjet më parë, Merkel inicoi dhe praktikoi një politikë të re në Ballkan që synon zbutjen e konflikteve dhe krijimin e një rajoni që nuk ka më konflikte por vetëm probleme që zgjidhen me dialog. Duke promovuar Edi Ramën dhe Aleksandër Vuçic, kancelarja gjermane ka vënë bastin mbi një stinë të re marrëdhëniesh mes shqiptarëve dhe serbëve duke parë nga e ardhmja dhe jo përplasjet e vjetra.
Angela Merkel, është bërë rivalja kryesore e influencës ruse në Lindjen e Europës dhe në Ballkan, ndaj dhe viziton Shqipërinë, Serbinë dhe Bosnjë-Hercegovinën për të dhënë një mesazh që Belini është mbrojtës i popujve që duan të braktisin tensionin.
Gjermania ka qenë shteti që i dha shkelmin e para Jugosllavisë së vjetër duke njohur Kroacinë dhe Slloveninë, ndërkohë që të gjithë të tjerët druheshin, ka vizituar Prishtinën dhe ka pritur me ceremoni dy kryeministra të Kosovës në Berlin. Gjermania realisht ka peshën kryesore në BE që Mitrovica, Zveçani dhe Zubin Potoku vazhdojnë të jenë pjesë e Republikës së Kosvës.
Ardhja e saj në Tiranë është një mesazh i rëndësishëm për shqiptarët, pasi përbën të parën vizitë shtetërore, ndërkohë që më parë kishte kaluar tangent por ka refuzuar Tiranën. Kjo vetëm se nuk ka përkrahur politikën e polarizuar dhe me dy fytyra. Në vitin 2011 tensioni me qeverinë e Berishës u rrit atëherë si pasojë e rrëzimit të një kontrate për ndërtimin e linjës së intekonjeksionit Shqipëri-Kosovë, që vonoi ndërtimin e këtij korridori energjitik.
Kancelarja Merkel vjen sot në Tiranë duke sjellë një mesazh por pritet të tregojë kushte të reja për Tiranën, ku në radhë të parë do të jetë pastrimi i drejtësisë nga korrupsioni. Dhe gjermanët në politikë kanë një shprehje “nuk duhet humbur kohë”, pasi kështu humbet një shans i rëndësishëm, për të qenë pjesë e një influence lideri në kontinent./tesheshi.com/
