Edhe pse jemi në fund të sezonit, edhe pse futbollistët e kanë mendjen më shumë te pushimet, nuk mungojnë surprizat.
Në nëntë ndeshjet e luajtura të premten në kualifikueset europiane për Botërorin 2018, dy rezultate kanë qenë të tilla, surprizë, por pa dyshim që në krye qëndron ai i Andorrës.
Shpresat e pakta të Hungarisë në grupin B të eliminatoreve për një kualifikim në Botëror kanë marrë një goditje përfundimtare me humbjen poshtëruese nga një ekip si Andorra.
Me vetëm 30 për qind të zotërimit të topit, Andorrës i ka mjaftuar një gol në minutën e 26-të për të fituar 1-0 ndaj Hungarisë.
Ja statistikat që e bëjnë historike fitoren e Andorrës, e që njëkohësisht e bëjnë po kaq dramatike humbjen e Hungarisë: e vetmja fitore e Andorrës në një ndeshje zyrtare i përket tetorit të 2004-s, ndaj Maqedonisë, pa mundur ta provojë shijen e fitores në 66 ndeshje pasardhëse! Shenja pozitive kishte patur gjithsesi: Andorra do të fitonte 2-0 ndaj San Marinos në shkurt, e në mars do të barazonte pa gola ndaj Ishujve Faroe në kualifikueset e Botërorit.
Surprizën tjetër e shkakton Suedia, që falë një gabimi të portierit kundërshtar, Hugo Lloris, fiton në çastet e fundit 2-1 ndaj Francës.
Fitorja e bën interesante situatën në grupin A, ku tani kryeson Suedia, edhe pse ka 13 pikë, aq sa Franca e vendit të dytë.
Shpresat për një kualifikim në këtë grup i mbajti gjallë dhe Holanda, e cila fitoi tenistikisht, 5-0, ndaj Luksemburgut.
Panoramën e grupit A e plotësoi takimi Bjellorusi – Bullgari, i përfunduar 2-1.
Në grupin B, veç fitores së Andorrës, munguan befasitë në dy takimet e tjera. Zvicra kryesuese mposhti 0-2 Ishujt Faroe, me gola të Xhakës dhe Shaqirit. Përndryshe, Portugalia e vendit të dytë fitoi 0-3 në fushën e Letonisë, ku dy prej golave mbajnë firmën e Ronaldos.
Për grupin H, Bosnjë-Hercegovina barazoi pa gola me Greqinë, Belgjika fitoi në transfertë 0-2 ndaj Estonisë, e po në fushë kundërshtare Qiproja mundi 1-2 Gjibraltarin më tepër se modest.
Belgjika mban qetësisht pozitat e vendit të parë në këtë grup, me katër pikë më shumë se Greqia e vendit të dytë. /tesheshi.com/
