Nga Blendi Gashi
Paralel me pemtimet, ajo çfarë është vënë re tek fushata e kreut të PDK-së Kadri Veseli, ka qenë dhe përlavdërimi i vetes dhe i Ramushit – por më shumë i këtij të fundit – pa lënë mënjanë akzuat ndaj kundërshtarëve potencialë, Hotit e Kurtit si jot ë duhurit për të qeverisur Kosovën.
“Kosovës i duhet një lidership i denjë dhe i aftë, që e do Kosovën shtet të pavarur dhe sovran, e do dhe mban të shenjtë flamurin e lirisë, flamurin tonë të shenjtë kombëtar dhe e mban të lartësuar në botë flamurin e shtetit tonë.
Një lidership që i mban shqiptarët të bashkuar dhe nuk i frikëson qytetarët tanë të përkatësive të tjera, si dhe që i trajton ata në mënyrë të barabartë në shtetin tonë të përbashkët.
Vendi ka nevojë për një lidership që merret me zhvillimin e vendit, në vend të marrjes me vetveten dhe për vetvete, që fuqizon dhe ndihmon të dijshmin, punëtorin dhe të ndershmin, duke mbajtur larg fjalëmëdhenjtë dhe punë paktit.
Një lidership që më shumë se për vete, mendon për përgjegjësinë që ka ndaj atdheut, sakrificës sonë dje dhe mbi të gjitha punon për të sotmen dhe të ardhmen më të mirë të vendit dhe kombit tonë”. Pra kjo ishte kryefajala e fjalimeve në 10 ditët e fushatës së Veselit, në pjesën e marrjes më kundërshtarët.
Dihet se studime dhe hulumtime të panumërta kanë sjellë argumente të detajuara të sjelljeve, stileve, aftësive dhe karakteristikave që i përkasin lidershipit.
Në vitin 2000 “Harvard Business Review” ka shpalosur 6 stile të ndryshme të lidershipit: komandues, vizionar, bindës, demokratik, “hap-qitës” dhe trajnues.
Andaj shtrohet pyetja: çfarë tipe të liderit janë Veseli, Haradinaj, pa analizuar fare Kurtin e Hotin?
Duke parë CV-në dhe përvojën e tyre mund të konkludohet se Veseli e Haradinaj janë pothuajse politikanë me stil të njëjtë lidershipi.
Ata më tepër i përkasin stilit komandues, kjo për faktin dhe të së kaluarës së tyre në luftë, ku ishin komandantë.
Të dy në bashkëqeverisje – nëse do mundet t’ja arrijnë dhe që për shumë arsye nuk do duhej t’ja arrinin – padyshim që mund të marrin vendime të mëdha, qofshin ato në favor apo jo të shtetin, pasi vartësit e partive respektive nuk janë nga ata burra që mund t’u kundërvihen.
Por nuk mund të thuhet se bëjnë pjesë në stilin e politikanëve vizionarë, pasi për aq kohës sa merren me politikë nuk kanë treguar se janë të tillë, e sigurisht as bindës.
Padyshim se nëse PDK-AAK-NISMA dalin fitues të zgjedhjeve dhe pasi të formojnë qeverinë do mësohet saktë se sa lidership i aftë dhe i guximshëm do jenë dyshja Veseli-Haradinaj.
Para vetes ata do kenë shumë tema të nxehta, si Demarkacioni me Malin e Zi, themelimi i ushtrisë, liberalizimi i vizave, Asociacioni; tema për të cilat PDK dhe Veseli në vazhdimësi e akuzuan LDK-në se nuk pati guxim t’i çojë përpara.
Lideshipi dhe guximi i Veselit e Haradinaj, poashtu do matet edhe me atë nëse do arrin të bashkojnë Mitrovicën ashtu siç kanë premtuar, nëse do arrijnë të kthejnë në shtëpitë e tyre banorët shqiptarë në veri të Mitrovicës, nëse do shuajnë përfundimisht strukturat ilegale atje, nëse do arrijnë ta fuqizojnë ekonominë, të miratojnë ligjin Anti-Mafia që parasheh konfiskimin e pasurisë të përfituar në mënyrë të paligjshme e shumë çështje tjera.
Siç shihet pra, janë pesha të mëdha për shpatullat e tyre, që, në qfoshin të gjëra për luftë, nuk janë hiç të tilla për kohë paqe me të tilla sfida. Dhe kjo nuk do shumë për t’u kuptuar. Deri më tani, është e pamundur të kuptohet se ç’aftësi a talent të veçantë ka secili prej tyre në drejtimin e shtetit. Janë bujëmëdhenj për shkak të “medaljeve” të luftës, por aspak për diçka tej saj. Ah, sikur të kuptohej drejt kjo nga votuesit! /tesheshi.com/
