Nga Mensur Krasniqi
Ashtu sikurse po afrohet 15 shtatori, datë kjo e cila sipas Marrëveshjes së Përzhinos e nënshkruar me rekomandim të ndërkombëtarëve nga liderët e katër partive politike më të mëdha në Maqedoni për zgjedhjen e Prokurorit Special, aq më shumë po i ngushtohen rrugët kryeministrit të Maqedonisë Nikolla Gruevski. Kështu analisti politik Sasho Ordanovski në një intervistë për Slloboden Pecat, theksoi se nuk ka shpëtim politik për Nikolla Gruevskin.
“Të huajt me të cilët kam pasur mundësi që të flas herën e fundit në takimet e Samitit Ballkanik në Vjenë, nuk kanë iluzione se me kënd kanë punë kur Gruevski dhe familja e tij gjenden në pushtet.
Për të kryesisht bisedohet si për një politikan nga e kaluara në Maqedoni, si një politikan me ikje definitive nga politika maqedonase.
Ata e kuptojnë se kjo lamtumirë po realizohet në disa episode, disa prej tyre argëtuese, të tjerat të dhimbshme, por e kanë të qartë, se pas përmbajtjeve të bombave dhe sidomos pas incidentit në Kumanovë nuk ka shpëtim politik për të”, deklaroi Sasho Ordanovski.
Ndërkaq, krerët e LSDM-së dhe VMRO-DPMNE-së një ditë më parë deklaruan se marrëveshja politike duhet zbatuar në tërësi, me theks të veçant zgjedhja e prokurorit special, mirëpo grupi punues ende nuk kanë arritur marrëveshje konkrete, dhe korniza ligjore për themelimin e prokurorisë speciale ende mungon.
Dështimi i mundshëm për të dakorduar prokurorin special mund të rrezikojë vazhdimin e dialogut të nivelit të lartë, i cili po ashtu duhet të mbahet gjatë kësaj vizite, por edhe procesin në tërësi. /tesheshi.com/
