Amerikanët do të shkojnë në zgjedhjet e 60-ta presidenciale në historinë e tyre të martën dhe e gjithë bota është në pritje të përfundimit të tyre të pasigurt, i cili do të ndikojë në një sërë konfliktesh dhe krizash globale.
Me vendim të Kongresit të vitit 1845, zgjedhjet presidenciale mbahen të martën pas të hënës së parë të nëntorit.
Votuesit amerikanë janë ende të ndarë mes republikanit Donald Trump dhe demokrates Kamala Harris dhe sondazhet tregojnë një garë të pasigurt.
Trump, një ish-president republikan 78-vjeçar, miliarder, i mbijetoi dy tentativave për vrasje gjatë fushatës, vetëm disa javë pasi një juri në Nju Jork e shpalli atë fajtor për falsifikim, duke u bërë ish-presidenti i parë i SHBA-së që dënohet për një krim.
Në korrik, Harris u bë papritur kandidatja e partisë së saj, duke i dhënë asaj mundësinë për t’u bërë presidentja e parë e SHBA-së, pasi presidenti aktual Joe Biden u tërhoq nga gara pas një performance të dobët në debat dhe presionit nga partia për të dhënë dorëheqjen.
Sondazhet tregojnë se dy kandidatët janë të barabartë në nivel kombëtar, por edhe në shtetet federale “të paqëndrueshme”.
Më shumë se 77 milionë amerikanë kanë votuar tashmë, por dita e zgjedhjeve do të tregojë se fushata e kujt ishte më e suksesshme në motivimin e tyre për të shkuar në votime.
Në ditët e fundit të fushatës, të dyja partitë vërshuan rrjetet sociale dhe mediat tradicionale me raundin e fundit të publicitetit, por edhe me vullnetarë që trokitën në dyert e votuesve të mundshëm. /tesheshi.com/
