Ambasadorët e Gjermanisë dhe Francës në Serbi thanë se propozimi i vendeve të tyre paraqet një shans edhe për Kosovën dhe Serbinë, pasi presidenti serb Aleksandar Vuçiç iu drejtua publikut të hënën në mbrëmje.
“Gjermania dhe Franca besojnë fuqishëm në procesin e dialogut dhe normalizimit të marrëdhënieve ndërmjet Beogradit dhe Prishtinës. Ne besojmë se ky është një proces i rëndësishëm dhe ndoshta e vetmja mënyrë për t’i dhënë fund konfliktit që kemi në rajon. Dëshira jonë është që dialogu të vazhdojë sa më shpejt dhe të japë rezultate. Çfarë saktësisht shkruhet në këtë propozim, nuk na takon ne ta themi. Është çështje e palëve kontraktuese”, tha ambasadorja gjermane Anke Konrad.
Kolegu i saj francez Pierre Koshar shtoi se nuk bëhet fjalë për kërcënime dhe sanksione, por për një mundësi që duhet shfrytëzuar.
“Është një mundësi për të përshpejtuar qasjen në Bashkimin Evropian, për të forcuar zhvillimin ekonomik dhe për të mundësuar përparimin e popullsisë së rajonit, duke përfshirë edhe minoritetin serb në Kosovë”.
Ambasadori amerikan Christopher Hill tha se e kanë dëgjuar me vëmendje fjalimin e presidentit të Serbisë dhe se në të është paraqitur plani dhe koncepti.
“Presidenti tha shumë qartë se Evropa është e ardhmja e Serbisë. Dua ta bëj të qartë se SHBA-ja e mbështet këtë të ardhme. Ne nuk kemi marrëdhënie më të mira me askënd sesa me Bashkimin Evropian. Bashkëpunimi më i ngushtë i Serbisë me Unionin dhe anëtarësimi i saj përfaqëson interesin tonë dhe ne e mbështesim fuqishëm këtë.”
Propozimi i Bashkimit Evropian mbështetet nga Gjermania, Franca dhe Amerika dhe iu prezantua të dyja palëve vitin e kaluar.
“Pasojat për Serbinë”
Vuçiç ka thënë se gjatë takimit me pesëshen diplomatike i është thënë tri herë se me çfarë pasojash do të përballet Serbia nëse nuk e pranon atë plan.
Siç ka thënë ai, gjatë fjalimit të tij para opinionit, në fjalinë e dytë i është thënë se Serbia duhet ta pranojë atë plan.
“Në fjalinë e dytë thuhej ‘duhet ta pranoni këtë plan dhe nëse nuk e pranoni, sepse mendojmë se duhet pranuar për rrugën drejt Evropës – do të përballeni: ndërprerje e procesit të integrimit evropian; me ndalimin e më pas tërheqjen e investimeve dhe me masa gjithëpërfshirëse në kuptimin politik dhe ekonomik që do të shkaktojnë dëme të mëdha për Serbinë”.
Më pas më është përsëritur tri herë gjatë bisedës dhe çdo herë kam reaguar shumë ashpër”, ka thënë Vuçiç. /tesheshi.com/
