Enkelejd Alibeaj, drejtuesi i Departamentit të Rendit e Sigurisë në Partinë Demokratike, ka ripërsëritur nëpërmjet një deklarate akuzat e forcës së tij politike për zaptim të vendit nga droga.
Duke iu referuar së përditshmes greke Kathimerini, Alibeaj është shprehur se “Eskobari” i Ballkanit, Klement Balili, shëtit lirshëm në Sarandë edhe pse është në kërkim ndërkombëtar.
Ai ka përmendur median italiane, që raporton, sipas tij, për ngarkesa të përditshme me drogë që mbërrijnë në Itali.
“Drogë e rritur, e kultivuar, e magazinuar, e transportuar nga Shqipëria drejt Italisë,” thuhet në deklaratën e përfaqësuesit të PD-së.
Citohet gjithashtu The Economist, që flet për përkeqësim të situatës së drogës në Shqipëri.
Ndërsa e ka quajtur të paturpshëm drejtorin e Policisë së Shtetit, Alibeaj ironizon Ramën, si dhe vartësin e tij, Saimir Tahirin.
“Me gjithë këto fakte, Edi Rama dhe Tahiri i tij thonë se në Shqipëri nuk ka drogë, dhe se degën e fundit e sekuestruan ata në një studio televizive.”
“Pasi e mbuloi Shqipërinë me kanabis,” ka deklaruar Alibeaj, “Edi Rama ka zgjedhur ta mohojë atë.” /tesheshi.com/
