Nga Blendi Gashi
Një fushatë e egër nga media të caktuara, më pas edhe nga njerëz të pushtetit, është ndërmarrë së fundmi ndaj deputetit të Vetëvendosje-s, Albin Kurtit. E gjitha kjo pas qëndrimit të tij në Norvegji ku takoi gruan dhe vajzën.
Pikërisht, shëtitja me vajzën nëpër qytetin e Oslos është marrë si shkas që Kurti të goditet aq fort, sa të cilësohet fajtori kryesor që la kosovarët pa viza.
Dhe jo rastësisht, “gjyqin” së pari ja ka bërë një media. Kush tjetër përveç gazetës online “Express”, që drejtohet nga ish-deputeti i PDK-së, Berat Buzhala, që botërisht dihet se është në “luftë” me Vetëvendosje-n dhe nuk lë ditë pa shkruar diç kundër tyre, vetëm pse vetëvendosësit kanë bojkotuar atë.
“Kthehu në Kosovë se s’do ketë luftë”
Rrugën e medias së lartcekur e kanë ndjekur edhe pushtetarë në vend, ku kanë ironizuar keq me vizitën e Kurtit tek familja e tij, duke thënë se opozitari duhet të qëndrojë në vendlindje edhe në ditë të mira dhe të vështira.
Është pikërisht kryekuvendari Kadri Veseli që ka bërë një deklaratë përçeshjeje në drejtim të Kuritit duke thënë se ai duhet të kthehet në Kosovë se nuk do të ketë luftë.
“Mos lejoni manipulime nga njerëzit që shohin vetëm zi, që të vetmin mendim e kanë vetëm karrigen. I ftojë që të kthehen në Kosovës, se janë frikuar se do të bëhet luftë. Këtu duhet me nejt edhe kur është keq e edhe kur është mirë”, ka thënë Veseli.
Pas PDK-së nuk ka mundur të mos flet diç edhe LDK-ja e Isa Mustafës për Kurtin.
Sekretari i kësaj partie, Ismet Beqiri, duke folur për rrëzimin e murit, ndonëse nuk ka përmendur me emër Vetëvendosje-n ka thënë se kjo çështje po tentohet të shfrytëzohet për politikë, nga disa që sipas tij “shohin vetëm zi”.
E ndërsa ka goditur Kurtin derisa ka folur për (mos)liberalizimin e vizave.
“Unë nuk kam asnjë shtet rezervë dhe asnjë pasaportë tjetër, prandaj e shoh si të domosdoshëm liberalizimin e vizave”, ka thënë Beqiri, duke bërë kështu fajtor Kurtin, për mos heqjen e vizave dhe aluduar në vizitën e tij në Norvegji.
“Lidhja media – pushtet”
Lidhur me këtë fushatë të ndërmarrë ndaj Kurtit nuk dëshirojnë shumë të merren në Vetëvendosje.
Shkodran Hoti, zyrtar për media i VV-së, thotë se kjo fushatë anti-Albinit po bëhet nga media që janë të lidhura me PDK-në.
“Thonë që çuditë zgjasin tre ditë, e edhe lidhja e Berat Buzhalës me Kadri Veselin zbardhet për po aq ditë. Lajmi gërditës për Albinin në Express nga Berati, citohet pas tre ditësh nga kreu i nëntokës dhe Parlamentit”, thotë Hoti, për tesheshi. com. Ai nuk ka dashur të thotë diç më shumë se pse po bëhet pikërisht tani kjo fushatë kundër Kurtit.
“90 % e pushtetarë kanë Vila për relaks e për kohë lufte e strehimi”
Për çështjen në fjalë ka reaguar edhe analisti politik, Donik Sallova i cili e sheh të çuditshme se si flitet aq shumë për një vizitë të Kurtit në familjen e tij në një shtet tjetër, kur edhe krejt pushtetarët dhe familjet e tyre kanë pasaporta.
“Po flasin për qëndrimin në Norvegji të Albin Kurtit me familje këta pushtetarët që shumica prej tyre kanë pasaporta diplomatike, shumica prej tyre kanë tashmë edhe shtetësi të Republikës së Shqipërisë. 90% e këtyre pushtetarëve tashmë kanë Villa nëpër brigjet e bukura të Shqipërisë, për kohë rekalsi e paqeje, por edhe për kohë lufte e strehimi! Këta pushtetarë që po flasin për Albin Kurtin i kanë çuar bijtë e bijat nëpër Ambasada e Konsullata dhe mjafton t’i shohësh profilet e tyre në rrjete sociale me fotografi festash e ndejash familjare në Neë York, Londër e gjetiu, ku veç bileta fluturimi ju kushtojnë 3-4 mijë euro. Këta pushtetarë që paguajnë shkolla elitare për fëmijtë e tyre në Europë, me shtëpi në lagjet më të shtrenjta të Prishtines, me villa në mal e në det, brenda dhe jashtë Kosovës të flasin për Albin Kurtin? Flasin sepse nuk e qeverisin një popull si rumunët, të cilët e kanë rrethu në demostrata pushtetin e korruptuar, për tu treguar se për ata që pasurohen në kurriz të popullit dhe e varfërojne atë, burgu është pak!”, ka shkruar Sallova në Facebook.
Ndryshe, mbetet të shihet nëse Kurti menjëhrë pas kthimit nga Norvegjia do i kundërpërgjigjet Veselit e Beqirit, apo këtë do e bëjë në seancën plenare të së enjtes. /tesheshi.com/
