Vendimi i Serbisë për të mos lejuar pjesëmarrjen e sportistëve kosovarë në Kampionatin Botëror të Boksit është “shkelje të normave ndërkombëtare të sportit”. Kështu tha kryeministri i Kosovës Albin Kurti përmes një postimi në Twitter.
“Serbia duhet ta tregojë forcën e saj në ringun e boksit, jo në kufi”, shkroi Kurti në Twitter.
Ai i bëri thirrje komunitetit ndërkombëtar që të dënojnë “këtë shkelje dhe veprim diskriminues”.
Qeveria e Kosovës ka paralajmëruar masa ndaj Serbisë. Ministri i Sportit, Hajrulla Çeku një ditë më parë tha se gjatë kësaj jave do të vendoset për ndalimin e zhvillimit të aktiviteteve sportive “paralele” serbe në Kosovë.
Ai tha se në Kosovë funksionojnë shumë struktura paralele të federatave serbe, në kundërshtim me ligjet e Kosovës.
Kampionati Botëror i Boksit, i cili sivjet mbahet në Beograd, filloi më 24 tetor dhe do të zgjasë deri më 6 nëntor. Por, Kosova nuk do të marrë pjesë në gara, pasi autoritetet e Serbisë nuk i kanë lejuar sportistët kosovarë të hyjnë në territorin e Serbisë.
Në këtë kampionat do të marrin pjesë rreth 650 garues nga 105 shtete. Kosovën në këtë kampionat ishte paraparë që ta përfaqësonin tre boksierë: Bashkim Bajoku, Shpëtim Bajoku dhe Patriot Behrami.
