Deputetëve të Lëvizjes Vetëvendosje, Albin Kurti e Donika Kadaj i ka kushtuar thyerja e arrestit shtëpiak, pasi policia ju ka trokitur të hënën mbrëma në derë dhe i ka dërguar sërish në burg.
Lajmi është konfirmuar nga zëdhënësja e policisë për rajonin e Prishtinës, Florie Ahmeti, e cila ka thënë se policia e ka zbatuar një urdhër të gjykatës.
Ndërsa gjykatësi Beqir Kalludra i cili është duke e gjykuar rastin vetëvendosësit ka deklaruar për kallxo.com se arsye për arrestimin e tyre është shkelja e masave të sigurisë të caktuara nga gjykata kur ata u liruan nga paraburgimi për në arrest shtëpiak tri ditë më parë.
Me vendimin e gjykatës nuk po pajtohet Vetëvendosje e cila e quan urdhër-arrestin të kundërligjshëm dhe është vepër penale.
“Arrestimi i deputetëve është i padrejtë dhe manifestim i qartë i persekutimit politik që po i bëhet Lëvizjes Vetëvendosje përmes organeve të rendit dhe drejtësisë, të cilat janë të kapura nga protagonistët e Klanit ‘Pronto’.
Kjo luftë speciale ndaj deputetëve tanë është dorëzim i qeverisë aktuale të Ramush Haradinajt kundruall agjendës së qeverive të mëhershme të Hashim Thaçit dhe Isa Mustafës, të cilat mbahen mend për cenimin e vazhdueshëm të sovranitetit dhe integritetit territorial të Republikës së Kosovës. Kjo qeveri dëshmon çdo ditë e më shumë se është vijmësi e shtetit të kapur. Vendosmëria jonë për ta mbrojtur interesin e Republikës së Kosovës është më e fuqishme se çdo persekutim që mund t’iu bëhet deputetëve dhe aktivistëve.
Rezistenca jonë kundër padrejtësive dhe rreziqeve që vijnë përmes projekteve si Demarkacioni dhe ‘Zajednica’ nuk mund të shtypen. Nga askush dhe asnjëherë. Hiq më larg se dje, populli e vërtetoi vullnetin e tij për çlirimin e shtetit nga garnitura e Klanit ‘Pronto’. Populli e ka ndalur Demarkacionin dhe ‘Zajednicën’. Këtë vullnet popullor nuk mund ta ndalë makineria e pushtetit të Klanit ‘Pronto’”, thuhet në reagimin e VV-së. /tesheshi.com/
