Një zhvillim i fundit i dhunshëm në kampionatin shqiptar, ku “viktimë” u bë arbitri Eldorian Hamiti i përballjes Kamza – Laçi, ka bërë që FSHF të reagojë ashpër duke vënë në shënjestër Policinë e Shtetit.
Sekretari i Përgjithshëm Ilir Shulku, tha se kjo që po ndodh në stadiumet shqiptare, me fajtore sipas tij policinë, mund të çojë deri në ndërprerjen e kampionatit.
“Policia nuk ka reaguar në lidhje me incidentet në stadiumet shqiptare, edhe pas reagimeve të FSHF. Kemi kërkuar ndërhyrjen e policisë pas ndeshjes së parë, ku luhej Skënderbeu dhe Partizani. Diçka e tillë ndodhi edhe javën e kaluar edhe ku u godit fotografi i Flamurtarit nga tifozët e Partizanit.
Edhe media e ka kërkuar diçka të tillë, por asnjë reagim nga shteti. Kush do i mbrojë lekët e këtyre presidentëve? Nuk është marrë asnjë masë nga organet shtetërore”, deklaroi Shulku, duke paralajmëruar më tej: “…do shikojmë seriozisht ndërprerjen e kampionatit. Shpresojmë që situata të mos agravohet por është e pamundur. Nëse policia nuk do të ketë reagim do të shikohet me shumë seriozisht vazhdimi ose ndërprerja e kampionatit”.
Po kaq i ashpër qe dhe Tahir Kastrati, kryetari i Shoqatës së Arbitrave, që tha se rendi dhe siguria publike në stadium është detyre e policisë së shtetit dhe se arbitrave po iu rrezikohet jeta.
“Jeta e gjyqtarëve është në rrezik. Ne si Shoqatë e Bashkimit të Albitrave të Futbollit Shqiptar kërkojmë me forcë që të bëjmë çmos për të ndaluar dhunën e ushtruar ndaj arbitrave, që sa vjen e përsëritet e thellohet. Kjo vjen si rrjedhojë e veprimeve e mosveprimeve të policisë në stadiume.
Të shqetësuar dhe të pambrojtur kërkojmë urgjentit të rikthehet policia në stadiume për të shmangur përsëritjen e ngarjeve të tilla të shëmtuara.
Mund të marrim dhe masa ekstreme deri në bojkotimin e aktivitetit nëse nuk merren masa për të shmangur ngjarje të tilla të rëndomta që rrezikojnë jetën e njeriut”, deklaroi Kastrati. /tesheshi.com/
