Procedimi i radhës në kuadër të situatës COVID nuk do jetë për ndonjë bluzë të bardhë por për të afërm pacientësh, madje prej atyre që kanë humbur njeriun e tyre.
Kështu, vajzat e të ndjerit Rifat Lako, humbur jetën pak ditë më parë nga COVID-i, do procedohen për shpifje publike ndaj mjekes Migena Qato, pasi pretenduan se kjo e fundit nuk i ka shërbyer të atit të tyre të ndjerë.
“Specialistët e Komisariatit të Policisë Nr. 4 filluan procedimin penal ndaj shtetaseve E. L. dhe I. L., sepse nëpërmjet rrjeteve sociale dhe medias së shkruar, kanë përhapur informacione të rreme për shtetasen M. Q., me detyrë mjeke.
Punohet për sqarimin e rrethanave të ngjarjes.Materialet i kaluan Prokurorisë së Rrethit Gjyqësor Tiranë, për veprime të mëtejshme”, thuhet në deklaratën e Policisë.
Kujtojmë se zërit denoncues të tyre iu bashkua dhe një ish-partiak i dikurshëm i PD-së, deputeti Vili Minarolli, i cili gjithashtu pretendoi se të ndjerit nuk i ishte dhënë shërbim. /tesheshi.com/
