Ish-komandantët e UÇK-së, Azem Syla, Shukri Buja, Sokol Dobruna janë në mesin e të akuzuarve të parë të Speciales. Ndaj tyre pritet të ngritet aktakuzë menjëherë pas shënimit të dhjetë-vjetorit të shpalljes së pavarësisë së Kosovës. Të paktën kështu shkruan “Insajderi” duke u thirrur në burime të afërta me Zyrën e Prokurorit të Specializuar.
Sipas këtij portali, Specialja ka gjetur prova për të akuzuar mbi 60 ish-drejtues dhe pjesëtarë të UÇK-së dhe aktakuzat nuk kanë të bëjnë vetëm me krime lufte, por edhe vepra tjera të kryera deri në fund të vitit 2000
Nën hetime për krime të rënda janë edhe presidenti, Hashim Thaçi dhe kryeparlamentari, Kadri Veseli. Thaçi, për rolin e tij si kryeministër i qeverisë së Përkohshme dhe anëtar i Shtabit të Përgjithshëm, derisa Veseli për rolin e tij si shef i Shërbimit Informativ të Kosovës (SHIK), por ata nuk pritet të akuzohen në valën e parë.
“Azem Syla pritet fillimisht të akuzohet për rolin e tij si drejtues që në Kosovë njihet si ‘Bllaca 2’. Hetimet për këtë rast në Kosovë janë pezulluar. Rasti ka kaluar në Hagë”, ka thënë ky burim.
Për rastin Bllaca, janë të dënuar 7 persona të cilët kanë kryer vrasje dhe sulme mbi njerëz të identifikuar si bashkëpunëtor të Serbisë dhe aktivistë të Lidhjes Demokratike të Kosovës.
Shukri Buja, dyshohet për rolin e tij në disa krime gjatë dhe pas luftës. Mes tyre është një sulm mbi një familje shqiptare në Godanc të Lipjanit.
Sokol Dobruna ndërkaq, dyshohet se si drejtues i Gjykatës së UÇK-së nuk i ka parandaluar arrestimet dhe vrasjet pa gjyq të shumë personave.
Derisa, Daut Haradinaj dyshohet për rolin e tij në një rast që njihet si Radoniqi. Aty besohet se shqiptarë, serbë dhe romë janë vrarë dhe hedhur në Liqenin e Radoniqit. Bëhet fjalë për 39 viktima.
Zyra e Prokurorit të Specializuar është duke hetuar edhe krimet që kanë ndodhur pas luftës, deri në fund të vitit 2000. Gjatë kësaj periudhe besohet se janë vrarë mbi 500 njerëz, shqiptarë, serbë dhe pjesëtarë tjerë. /tesheshi.com/
