Agjencia e lajmeve AFP i ka kushtuar një reportazh të shkurtër, atij që konsiderohet si tubimi më i madh i besimtarëve muslimanë në botë, Haxhi. Ky eveniment që ndodh një herë në vit, e që përbën një nga 5 shtyllat e Islamit, përbëhet nga një sërë ritualesh. Dhe të dielën, një ditë para Kurban Bajramit, është një ndër kulmet, dita e Arafatit, aty ku mendohet se ka nisur jeta mbi tokë, e ku Profeti Muhamed kumtoi atë që iu shpall nga Zoti, që e vetmja fe për njerëzimin është dhe duhet të jetë Islami.
Pjesë nga shkrimi:
Afër 1.5 milion muslimanë nga e gjithë bota janë tubuar këtë të shtunë në mbrëmje në dhe përreth një kodre shkëmbore të njohur si “Mali i Arafatit”, duke u përgatitur kështu për kulminacionin e pelegrinazhit vjetor të Haxhit.
Pelegrinët do të shënojnë ditën e dielë me lutje gjatë gjithë ditës dhe lexim e këndim Kur’ani në Arafat, aty ku Profeti Muhamed mbajti fjalimin e tij të fundit, të njohur si Hutbeja e Lamtumirës.
Pas ritualeve paraprake gjatë gjithë javës në Xhaminë e Madhe në Mekë, ose ndryshe në Qabe, masa e madhe e besimtarëveështë zhvendosur në qytetin e tendave në Mina, për të vijuar më pas për disa kilometra drejt “Malit Arafat”.
Haxhinjtë në këtë mënyrë ndjekin gjurmët e profetit Muhamed, i cili ka kryer të njëjtat rituale rreth 1.400 vite më parë.
“Është e mrekullueshme. Jam këtu më afër Zotit. Kjo është një ndjenjë e papërshkrueshme”, thotë Louza, një besimtare egjiptiane 45-vjeçare.
Haxhi është një prej pesë shtyllave të Islamit, të cilin duhet ta kryejnë çdo musliman që ka mundësi të paktën një herë në jetë, duke shënuar kështu kulmin shpirtëror në jetën e tyre.
“Njerëzit vijnë nga çdo vend i botës, flasin çdo gjuhë të botës dhe takohen këtu në një vend nën një flamur, atë të besimit islam”, thotë Ashraf Zalat, 43-vjeçare nga Egjipti.
Pas Mekës, baza e ardhshme për haxhinjtë do jetë Mina, një hapësirë e gjërë e mbushur me tenda të bardha të cilat do të mund të akomodojnë 2.6 milion njerëz në një luginë e cila ndodhet poshtë kodrave të zhveshura.
Me 24 shtator në vitin e kaluar Mina ishte skenë e një fatkeqësie vdekjeprurëse, ku disa pelegrinë u shtypën gjatë kohës që po ecnin për në urën Jamarat, për të kryer ritualin e hedhjes së guralecëve.
Këtë vit, ky ritual do të jetë të hënën.
Në mesin e ndryshimeve që janë bërë këtë vit, objektet qeveritare janë zhvendosur nga Mina për të liruar sa më tepër hapësirë, ndërkaq rrugët në Jamarat janë zgjeruar më shumë, njoftojnë gazetat saudite.
Zyrtarët gjithashtu kanë pajisur pelegrinët me rrathë dore të cilët ruajnë të dhënat e tyre personale në mënyrë digxhitale.
Autoritetet synojnë t’i pajisin me rrathë dore secilin prej 1.3 milion haxhinjve nga jashtë, të cilët u janë bashkangjitur 100.000 muslimanëve vendas të Arabisë Saudie.
Zëdhënësi i Ministrisë së Brendshme, Gjenerali Mansour al-Turki foli për “përpjekjet e mëdha të Mbretërisë, jo vetëm në ruajtjen e sigurisë, por edhe në lehtësimin e kryerjes së ritualeve në mënyrë sa më komode të mundshme”.
Haxhinjtë duken të jenë të kënaqur.
“’Çdo gjë është e organizuar mirë”, thotë Nasser Benfitah, 54-vjeçar nga Maroku.
“Ndihemi të sigurtë”, shtoi pelegrinja nigeriane Hafsa Amina, 26-vjeçare.
Arabia Saudite ka investuar me miliona dollarë në infrastrukturën e Haxhit dhe projekte të sigurisë gjatë viteve.
Haxhi tërheq të pasur dhe të varfër, humanizmi i përbashkët i të cilëve është i shprehur me një veshje të bardhë të cilën duhet t’a veshë secili haxhi, ndërkaq femrat pelegrine veshin rroba të lirshme, po ashtu ngjyrë të bardhë. /tesheshi.com/
