Nga Blendi Gashi
Zgjedhja e Presidentit të vendit dhe Gjykata Speciale janë dy çështjet me të cilat pritet të ballafaqohet vendi në fillimvitin 2016-të, si dhe me zgjidhjen e krizës politike që ka tronditur politikën kosovare që më shumë se tre muaj.
Për t’i dhënë fund kësaj krize janë shtuar zërat ditëve të fundit se në muajt e parë të vitit të ri do të ketë ndryshime rrënjësore në skenën politike, pasi do të prishet koalicioni aktual PDK-LDK dhe do të ndërtohet një koalicion i ri më i gjërë.
Sipas shkrimeve të mediave, PDK do të ndërtoj koalicion me AAK-në, NISMA-n dhe Srpska-n. Gjithnjë sipas këtyre zërave, Hashim Thaçi s’do bëhet president siç është e paraparë nga partnerët e koalicionit, por do të rikthehet në postin e kryeministrit kurse Ramush Haradinaj do të emërohet në pozitën e zv.kryeministrit të parë dhe njëherit do të emërohet ministër i Brendshëm.
Pjesë e koalicionit raportohet se do të jenë NISMA e Fatmir Limajt dhe Lista Serbe, deri LDK e kryeministrit aktual Isa Mustafa do të mbetet në opozitë së bashku me Lëvizjen ‘Vetëvendosje’.
Pas këtyre lajmeve, portali mbarëkombëtarë tesheshi.com ka kontaktuar partinë e Ramush Haradinajt, AAK-në, dhe NISMA-n e Fatmir Limajt, parti këto që janë përmendur se mund të hyjnë në koalicion me PDK-në dhe Listën Serbe vitin që po hyjmë.
Këto dy parti opozitare në mënyrë kategorike kanë mohuar këto lajme duke thënë se janë të gatuara nga pushteti.
Zëdhënësi i kësaj partie, Muharrem Nitaj ka thënë për tesheshi.com se të gjitha ato lajme që ndërlidhin AAK-në në koalicion me PDK-në janë të pavërteta, pjesë e propagandës së pushtetit dhe lajme që bëhen me qëllime të caktuara.
“E para provohet të krijohet një bindje në opinion se krejt ky kundërshtim i AAK-së po bëhet për pushtet dhe dyta, provohet të amortizohet arrestimi dhe burgosja e deputetëve. Nuk e di çka do të ndodhë në vitin e ardhshëm, por e para që duhet të ndodhë është zhvlerësimi i marrëveshjeve dhe heqja dorë nga modeli qeveritar që krizën politike ta zgjidhë me polici. Kjo do të ndodhë sepse është bërë boll”, ka deklaruar Nitaj.
Sekretari i NISMA-s për Kosovën, Bilall Sherifi, lajmet e tilla nuk ja vlejnë të komentohen.
“Këto janë spekulime të cilat nuk meritojnë serioz”, ka deklaruar Sherifi, duke mos komentuar diç më shumë.
Ja ç’thonë analistët
Edhe analistët nuk e shohin si mundësi reale ndryshimet rrënjësore në qeveri të paralajmëruara nga media të ndryshme, por thonë se më tepër shkrime të tilla bëhen për ta matur opinionin publik.
Analisti politik, Albinot Maloku, në një prononcim për tesheshi.com thotë se ndryshimet e përfolura të Qeverisë së Kosovës, duke u ndërruar partnerët e koalicionit sipas përbërjes aktuale të Kuvendit të Kosovës dhe pozicionit e numrave të subjekteve politike brenda tij, janë asgjë më shumë sesa ‘provë për të ecur mbi ujë’.
“Të përfolurën se Aleanca për Ardhmërinë e Kosovës e Ramush Haradinajt së bashku me NISMA-n e Listën Serbe mund të futen në koalicion me PDK-në e Hashim Thaçit e shoh vetëm si matje të opinionit publik, sesa si mundësi reale. Gjithsesi, AAK, sa herë ka mohuar diçka ka ndodhur e kundërta, por me këtë konstelacion numrash e pozicionesh të subjekteve politike parlamentare me këtë krizë politike, nuk e shoh as të arsyeshëm e as të dobishëm, e mbi të gjitha as lëvizës të krizës politike këtë mundësi koalicion”, thotë Maloku. /tesheshi.com/
