Nga Bashkim Kastrati
Kryeministri i Kosovës Isa Mustafa, ka dhënë shenjat e para konkrete se qeveria e Kosovës mund të heqë dorë nga krijimi i Ushtrisë së Kosovës. Kjo mund të ndodhë për faktin se ndryshmet kushtetuese për ta realizuar transferimin e FSK-së në Forca të Armatosura të Kosovës, mund të mos përkrahen nga “Lista Serbe”, e cila është partnere e koalicionit qeverisës.
“Koalicioni qeverisës PDK-LDK, së bashku me partnerët e tjerë po punon në transformimin e FSK-së në ushtri të Kosovës. Unë dhe z. Thaçi kemi vlerësuar se nuk ka arsye të prolongohet transformimi i FSK-së dhe që ky transformim të varet nga vullneti i një subjekti politik. FSK është forcë multietnike dhe në shërbim të të gjithë qytetarëve. Me veprimet dhe aksionet e saj, pjesëtarët e FSK-së kanë treguar përkushtim në të gjitha situatat emergjente dhe rreziqet në çdo pjesë të vendit tonë dhe për çdo njeri. Janë treguar shembull në misionet humanitare. Në rast të mungesës së mirëkuptimit për amendamente Kushtetuese, të cilat e tranformojnë FSK-në në FAK, Qeveria do të procedojë me ndryshimet dhe plotësimet e Ligjit mbi FSK-në, me të cilin FSK do të merr të gjitha përgjegjësitë që ishin të parapara për FAK. Ndërkaq do ta ndryshojmë emrin e Ministrisë së FSK-së”, ka shkruar Mustafa sot në llogarinë e tij në facebook.
Ushtria është dashur të votohet si paketë me Gjykatën Speciale
Publicisti Faik Krasniqi, ka thënë për tesheshi.com se qeveria e Kosovës dhe Isa Mustafa, e kanë ditur prej fillimit që ”Lista Serbe” nuk do ta votojë Ushtrinë e Kosovës, pasi që këtë e kanë thënë gjithmonë haptas! 
Ai thotë se qeveria e Kosovës duke e ditur që “Lista Serbe” nuk do ta votojë dhe pa votat e tyre nuk mund të krijohet Ushtria e Kosovës, sepse nevojiten edhe votat e 2/3 të deputetëve minoritarë.
“Isa Mustafa dhe qeveria është dashur që krahas votimit të Gjykatës Speciale, ta fusin edhe Ushtrinë e Kosovë, votim në paketë. Por kjo tregon që Isa Mustafa është kryeministër i dobët dhe njeri i kamuflimeve, improvizimeve dhe mashtrues njëkohësisht. Kështu që vetëm ndonjë presion i madh ndërkombëtar do t’i detyronte serbët që ta votojnë Ushtrinë e Kosovës, përndryshe do të ngelemi pa krijimin e saj. Dhe ky presion edhe nëse bëhet, do t’i bëhet qeverisë së Serbisë, në mënyrë që ata t’i shtyjnë deputetët serbë të ”Listës Serbe” që ta votojnë Ushtrinë e Kosovës, sepse kjo Listë është e krijuar nga qeveria serbe dhe dirigjohet dhe bindet vetëm urdhrave të tyre”, thotë Krasniqi, duke shtuar se fjalori banal i Isa Mustafës ditëve të fundit, tregon që ai nuk është menaxher i mirë për një shtet dhe se kur një kryeministër përdor fjalë të rrugaçëve, çfarë mund të pritet nga ana e tij rreth gjërave madhore siç është Ushtria e Kosovës.
“Lista Serbe” mund ta ndajë ushtrinë në dy pjesë
Opinionisti Krenar Shala, ka thënë për tesheshi.com se pas nënshkrimit të marrëveshjes për asociacionin, qeveria, siç ishte pritur, u ballafaqua me reagime të ashpra në kundërshtim të kësaj marrëveshjeje, gjë e cila, sipas tij është pengesë për zhvillimin dhe shtet-ndërtimin. 
Ai thotë se për të bërë të mundur zbehjen e këtij reaksioni, Kryeministri Mustafa mundohet t’i balancojë reagimet me thirrjen kinse qeveria nuk do ta pyes “Listën Serbe” – Beogradin, rreth domosdoshmërisë së themelimit të ushtrisë së Kosovës.
“Dihet që marrëveshja e Brukselit e ka shndërruar Beogradin në partner qeverisës në Kosovë. Asociacioni vetëm e dëshmon këtë. Duke e marrë parasysh këtë fakt, themelimi i ushtrisë së Kosovës do të varet patjetër edhe nga qëndrimi i Beogradit. Ndërkohë, qëndrimi i Beogradit është negativ sa i përket kësaj çështjeje”, theksoi Shala.
Ai mendon se ushtria e Kosovës do të jetë e ndarë dhe se do të krijohet një formacion paralel ushtarak i cili do të kontrollohet nga Beogradi, dhe i cili do të vendoset në territorin e Bashkësisë së Komunave Serbe.
“Dihet që ligjet janë në përputhje me Kushtetutën. Po të mos ishte ashtu, qeveria nuk do të mund ta miratonte ligjin për FSK-në, atëbotë. Do të kishte reaksion politik nga organi për mbikëqyrjen e pavarësisë, Zyra Civile Ndërkombëtare. Pra, për të themeluar ushtrinë, nevojitet ndryshimi i kushtetutës. E për të ndryshuar kushtetutën, duhet të pyetet edhe Beogradi. E nëse pyetet Beogradi, ushtria e Kosovës do të ketë dy njësi: Njëra njësi për Republikën e Kosovës dhe njësia tjetër për territorin e Asociacionit”, u shpreh Shala.
Ndërkaq analisti, Blerim Burjani ka thënë për tesheshi.com se Kuvendi i Kosovës dhe ky koalicion qeverisës duhet të gjejnë rrugën procedurale për të ndryshuar Kushtetutën e vendit,andaj sipas tij nuk ka justifikim tjetër.
“Përpjekjet serbe dhe të “Listës Serbe” janë të ndalin themelimin, por kjo duhet të jetë e qartë, pra votimi duhet të sigurohet në kuvend. Tentativa është se KFOR-i të mbetët e vetmja force mbrojtëse edhe një kohe,kohë dhe kjo po vjen si rezultat i presionit që bënë “Lista Serbe”, thotë Burjani. /tesheshi.com/
