Grupi i parë nga refugjatët që përjetuan bllokimin e autoriteteve hungareze në udhëtimin e tyre përmes Europës, arritën në Mynih ku janë pritur me dashamirësi nga qytetarët që kishin dalë enkas për t’i pritur.
Pas bllokimit dyditor në Hungari, refugjatët udhëtuan me autobuzë drejt Austrisë dhe më në fund, 450 prej tyre ia kanë dalë të mbërrijnë në destinacionin që kishin në mendje që kur u nisën me anije përmes Mesdheut, në Gjermani.
Skenat kaotike në stacionin qendror të trenave në Budapest dhe tragjeditë më të fundit në det, ku u mbytën sërish me dhjetëra refugjatë, kanë vendosur në fokus dëshpërimin e këtyre njerëzve dhe nevojën që ata kanë për mbështetje.
Refugjatët janë pritur me brohoritje dhe qytetarët kanë shpërndarë ëmbëlsira për ta sapo autobuzi i parë mbërriti në Mynih. Gjermania dhe Austria thanë se do të strehojnë 10 mijë refugjatët e bllokuar më herët nga Hungaria, kur kjo e fundit vendosi të lirojë kufijtë për udhëtimin e tyre.
Ndërkaq, shefja e Politikës së Jashtme në BE, Federica Mogherini pas një takimi të tensionuar me ministrat e Jashtëm të BE-së në Luksemburg, tha se kriza e refugjatëve do të jetë afatgjatë. Ajo apeloi shtetet anëtare të gjejnë zgjidhje të përbashkët. /tesheshi.com/
