Ministri i Jashtëm i Arabisë Saudite, Princi Faisal bin Farhan tha të premten se mbretëria kundërshton me vendosmëri çdo përpjekje për të zhvendosur me forcë palestinezët nga Rripi i Gazës, pavarësisht nga preteksti, raporton Anadolu.
“Ne refuzojmë kategorikisht zhvendosjen e popullit palestinez nga Gaza me çdo pretekst,” tha Faisal në një konferencë shtypi pas një takimi të Grupit të Kontaktit të Gazës të mbajtur në kuadër të Forumit Diplomatik të Antalias në Turqi.
Ai dënoi gjithashtu krijimin e planeve të tilla si “migrimi vullnetar”, duke theksuar se një terminologji e tillë është e papranueshme në kushtet aktuale.
“Biseda për migrimin vullnetar nuk mund të pranohet kur palestinezët janë të privuar nga nevojat më elementare të jetës,” tha ai.
Presidenti amerikan Donald Trump ka propozuar zhvendosjen e 2.1 milionë palestinezëve nga Gaza dhe kthimin e enklavës në një “rivierë”.
Ministri saudit bëri thirrje për “një armëpushim të menjëhershëm në Gaza dhe theksoi nevojën urgjente për të siguruar shpërndarjen e papenguar të ndihmave humanitare në enklavën e rrethuar”.
Ushtria izraelite e rinovoi sulmin e saj në Gaza më 18 mars, duke shkelur marrëveshjen e armëpushimit dhe shkëmbimit të të burgosurve të 19 janarit.
Më shumë se 50,800 palestinezë, kryesisht gra dhe fëmijë, janë vrarë në Gaza që nga 7 tetori 2023. /tesheshi.com/
