Elon Musk, njeriu më i pasur dhe më me ndikim në planet nuk resht së sfiduari me qëndrimin, zgjedhjet dhe mënyrën se si dëshiron të konfirmojë ndikimin dhe dinamikën globale që ka në duar.
Pas mënyrës në të cilën ai mbështeti fituesin dhe presidentin e pritshëm të SHBA-së, Donald Trump, pak para zgjedhjeve amerikane, Elon Musk vendosi të ndikojë dhe në zgjedhjet e pritshme në Gjermani.
Me një postim sot, Musk pretendon se zgjedhja më e mirë për gjermanët është partia e ekstremit të djathtë “Alternativa për Gjermaninë”.
Postimi jo vetëm që shkaktoi lëvizje, por nga njëra anë solli një mesazh falënderimi personal nga kryetarja e partisë gjermane Alice Ëidel për të.
Edhe Kancelari Scholz reagoi, duke sqaruar se të gjithë kanë të drejtën e një mendimi, veçanërisht në demokraci… duke lënë të kuptohet se ndikimi i Elon Musk është e drejta e tij, por ka kufij.
Kjo nuk është hera e parë që manjati i teknologjisë, pronari i X dhe njeriu aspirant i hapësirës ka zgjedhur të përfshihet në çështjet politike të Evropës.
Rreth një muaj më parë, Musk kritikoi hapur drejtësinë italiane e cila me një rezolutë bllokoi ekstradimin e emigrantëve të paligjshëm nga vendi në objektet që kryeministrja Meloni dhe homologu i saj shqiptar Edi Rama kanë ngritur në Shqipëri. Madje, gjyqtarët italianë kritikuan hapur Musk për mënyrën sesi ai zgjodhi të pozicionohej në një çështje kombëtare të Italisë. Megjithatë, Georgia Meloni e përdori pozicionin e Musk në avantazhin e saj, duke dashur të jetë në rrethin e vogël të liderëve të huaj që do të kenë akses të drejtpërdrejtë në zyrën ovale pas 20 janarit.
Pyetja është ndoshta e lehtë për t’u formuluar, por në këto çështje dhe me këto përmasa, përgjigjet nuk janë të lehta. Pse Musk, për shembull, zgjedh të mbështesë të djathtën ekstreme në Evropë?
