Në një seancë të përbashkët mes dy Kuvendeve, Shqipërisë dhe Kosovës, kryeministri Albin Kurti kujtoi duke thënë se “dy shtetet tona edhe pse të themeluara në një distancë kohore nga njëri tjetri janë shprehje politike e së njëjtës aspiratë shekullore të shqiptarëve për ruajtjen e identitetit dhe bashkimit kombëtar”.
Ai kujtoi madje se “legjislatura e parë e Kuvendit të Shqipërisë e dalë nga zgjedhjet pluraliste e njohu shpalljen e Republikës së Kosovës me rezolutën e datës 21 tetor 1991. Ndjenja e vëllazërisë vetëdija historike dhe përgjegjësia para qytetarëve që na kanë zgjedhur për t’i përfaqësuar motivojnë mbledhje si këto”.
Edhe për të tashmen me dy shteteve, ndarë padrejtësisht nga gjeopolitikat e shekullit të 20-të, Kurti pati vlerësime të larta, ilustruar me shifra.
“Shqipëria është ndër pesë vendet e para me të cilën Kosova ka vëllimet më të mëdha të shkëmbimeve tregtare dhe partneri kryesor tregtar i Kosovës për vitin 2023 me vlerën 440 milionë euro. Tregu i përbashkët energjetik ALPEX Albanian Poëer Exchange është funksional. Lëvizja pa asnjë kontroll e qytetarëve në kufi për një periudhë 9 mujore dhe gjatë fundjavave. Hapja e 26 vendkalimeve të reja për mbi 200 mijë banorë të zonave kufitare dhe rehabilitimi i disa segmenteve rrugore të fshatrave kufitare Shqipëri-Kosovë. Hapja e dy zyrave doganore në Durrës dhe Porto-Romano dhe reduktimi i skanimit të dyfishtë nga 100% në 10%. Hapja e korridoreve të reja për fluturime komerciale që kanë shkurtuar fluturimet për dhe nga Kosova. Ofrimin e shërbimeve mjekësore nga spitalet e zonave kufitare, Kukës, Gjakovë, Prizren për banorët e tyre”.
Më tej, Kurti perifrazoi: “Siç ka thënë prozatori ynë i mirënjohur Primo Shllaku, ‘kufiri ndërmjet Kosovë dhe Shqipërisë është si kufiri mes dy barkusheve të zemrës’”.
Kurti vuri theksin gjithashtu dhe te ata qindra shqiptare në troje të tjera ballkanase.
“Kemi punë përpara jo vetëm ndaj qytetarëve tanë, por edhe për të ndihmuar për sigurinë e jetesën e dinjitetshme të shqiptarëve në shtetet fqinje, në Maqedoninë e Veriut, Malin e Zi, por sidomos në Luginën e Preshevës. Shqiptarët nën Serbi janë komuniteti etnik më i diskriminuar në Europë, prandaj ata meritojnë vëmendje më të madhe në bashkërendimin e politikave rajonale të Republikës së Shqipërisë dhe Kosovës. Shqiptarët nuk janë fajtorë që janë autoktonë. Në buxhetin e vitit të ardhshëm kemi ndarë si qeveri e Kosovës katër milionë euro për Luginën e Preshevës, uroj të shërbejë kjo si një shembull edhe për Shqipërinë”. /tesheshi.com/
